ورالدا ءبىر ەر ادام تانىسىن قانعا بوكتىرىپ، كەيىن ءوزىن-وزى قورعاۋ شەگىندە ارەكەت ەتكەنىن ايتقان. الايدا سوت ونىڭ دالەلدەرىنە سەنبەدى، دەپ حابارلايدى infohub.kz سايتى.
«كاسساسيالىق سوتتاردىڭ وزەكتى جاڭالىقتارى» Telegram-ارناسىندا حابارلانعانداي، ورال تۇرعىنى ءوز پاتەرىندە تانىسىنىڭ باسىنا، كەۋدەسىنە، ىشىنە، ارقاسىنا جانە جامباسىنا بىرنەشە رەت پىشاق ۇرعان. ناتيجەسىندە جابىرلەنۋشىنىڭ دەنساۋلىعىنا ومىرىنە ءقاۋىپ توندىرەتىن اۋىر زيان كەلتىرىلگەن.
ءبىرىنشى ساتىداعى سوت ەر ادامدى قىلمىستىق كودەكستىڭ 106-بابىنىڭ 1-بولىگى بويىنشا (دەنساۋلىققا قاساقانا اۋىر زيان كەلتىرۋ) كىنالى دەپ تانىپ، بەس جىلعا باس بوستاندىعىنان ايىردى. اپەللياسيالىق ساتى ۇكىمدى وزگەرىسسىز قالدىردى.
كاسساسيالىق شاعىمدا سوتتالعان ادام بۇرىنعى سوت شەشىمدەرىنىڭ كۇشىن جويۋدى جانە ونىڭ ارەكەتتەرىن قايتا سارالاۋدى سۇراپ، جانجال مەن پىشاقتاپ شابۋىلدىڭ باستاماشىسى جابىرلەنۋشى بولعانىن مالىمدەگەن. ونىڭ ايتۋىنشا، ول ءوزىن-وزى قورعاۋ ماقساتىندا پىشاقتى تارتىپ الىپ، جاۋاپ رەتىندە ۇرعان.
كاسساسيالىق سوت ەر ادامنىڭ قاجەتتى قورعانىس تۋرالى دالەلدەرىن نەگىزسىز دەپ تانىدى. زەرتتەلگەن دالەلدەمەلەرگە سايكەس، ماس كۇيىندە سوتتالعان ادام جابىرلەنۋشىگە ومىرلىك ماڭىزدى ورگاندارعا كەمىندە ون رەت پىشاق ۇرىپ، كوپتەگەن جاراقاتتار مەن ومىرگە ءقاۋىپتى قان كەتۋدى تۋدىرعان.
سونىمەن قاتار، جابىرلەنۋشى ەشقانداي قارسىلىق كورسەتپەگەن، ونىڭ تاراپىنان قورعاۋدى قاجەت ەتەتىن شابۋىل نەمەسە وزگە دە ءقاۋىپتى ارەكەتتەر بولماعان. جاراقاتتاردىڭ سيپاتى مەن وقيعانىڭ ءمان-جايى شابۋىلدى ءدال تانىسى جاساعانىن كورسەتكەن.
جابىرلەنۋشىنىڭ ايعاقتارى سوت ساراپتامالارىنىڭ ناتيجەلەرىمەن، كۋاگەرلەردىڭ ايعاقتارىمەن جانە وقيعا ورنىن قاراۋ دەرەكتەرىمەن سايكەس كەلەدى، وندا پىشاق پەن قان ىزدەرى تابىلعان.
كاسساسيالىق سوت قك 106-بابىنىڭ 1-بولىگى بويىنشا ارەكەتتەردىڭ سارالانۋىنىڭ زاڭدىلىعىن، تاعايىندالعان جازانىڭ اۋىرلىق دارەجەسىنە سايكەستىگىن جانە ءىستى قاراۋ كەزىندە پروسەستىك تالاپتاردىڭ ساقتالعانىن راستادى.