ورالدا 11 جاسار بالانىڭ ۇستىنە فۋتبول قاقپاسى قۇلاپ، قايتىس بولۋىنا بايلانىستى رەزونانستى سوت پروسەسى اياقتالدى. سوت اقتاۋ ۇكىمىن شىعاردى، دەپ حابارلايدى infohub.kz سايتى.
قايعىلى وقيعا 2022 جىلدىڭ 27 شىلدەسىندە بولدى. بىرنەشە جىل بويى ءىس سوت ينستانسيالارىندا قارالدى. باستاپقىدا ايىپتاۋ «ورال» سپورت كلۋبىنىڭ بۇرىنعى ديرەكتورىنا تاعىلعان ەدى، الايدا جاڭا قاراۋ بارىسىندا جاۋاپكەرشىلىك وسى كلۋبتىڭ سپورت الاڭدارىنىڭ مەڭگەرۋشىسىنە جۇكتەلدى.
2026 جىلدىڭ 25 تامىزىندا ورال قالالىق سوتىنىڭ سۋدياسى ابادان مامىروۆتىڭ توراعالىعىمەن تاراپتاردىڭ پىكىرتالاسى ءوتتى. مەملەكەتتىك ايىپتاۋشى ەراسىل ەرعالييەۆ سوتتالۋشىنى كىنالى دەپ تانۋدى تالاپ ەتىپ، وعان 4 جىل 8 اي مەرزىمگە باس بوستاندىعىنان ايىرۋ جازاسىن تاعايىنداۋدى جانە ونى سوت زالىندا قاماۋعا الۋدى سۇرادى.
سوتتالۋشى ءوز سوزىندە بولعان وقيعاعا قاتتى وكىنەتىنىن ءبىلدىردى، ءبىراق تاعىلعان ايىپتاردى مۇلدەم جوققا شىعاردى. ول: «بالانىڭ قايتىس بولعانىن ءتۇسىنۋ اۋىر. مەن ايىپتالىپ وتىرعان قىلمىستى جاساعان جوقپىن. مەن بولعان وقيعانىڭ ءوزىن جوققا شىعارمايمىن، ءبىراق مەنىڭ ارەكەتتەرىم نەمەسە ارەكەتسىزدىگىم تراگەدياعا اكەلدى دەگەنگە مۇلدەم قارسىمىن. جسق جوباعا سايكەس كەلمەدى، بۇل وتە ماڭىزدى. قاقپالار 2011 جىلى پايدالانۋعا قابىلدانعان. بۇزۋشىلىق نىسان قۇرىلىسىنىڭ باسىنان باستاپ بولعان. مەنىڭ كىنام نە؟ مەن قاقپانى جاساعان جوقپىن جانە ورناتقان جوقپىن. سوتتان دالەلدەمەلەرگە سۇيەنۋدى سۇرايمىن. مەنىڭ ارەكەتتەرىمدە قىلمىس قۇرامى جوق دەپ سانايمىن. ءادىل شەشىم شىعارىپ، مەنى اقتاۋدى سۇرايمىن. سوتتىڭ ادىلدىگىنە سەنەمىن»، — دەدى.
1 قىركۇيەكتە سۋديا ابادان مامىروۆ ۇكىم جاريالادى: «سوت سوتتالۋشىنى كىناسىز دەپ تانىپ، قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى اقتادى».
ۇكىم جاريالانعاننان كەيىن سۋديا اقتاۋ نەگىزدەرىن ءتۇسىندىرىپ، باتىس قازاقستان وبلىسىنىڭ پوليسيا دەپارتامەنتىنە، پروكۋراتۋراعا جانە اكىمدىگىنە جەكە قاۋلىلار شىعارىلعانىن حابارلادى. سوت تەرگەۋى بارىسىندا سوتقا دەيىنگى تەرگەۋ ورگاندارى جىبەرگەن زاڭنىڭ ەلەۋلى بۇزۋشىلىقتارى انىقتالدى. تەرگەۋشىلەر تەرگەۋ مەرزىمدەرىن فورمالدى نەگىزدەرمەن جۇيەلى تۇردە ءۇزىپ وتىرعان، مىسالى، ءىس جۇزىندە جۇرگىزىلمەگەن ساراپتامالاردى تاعايىنداۋ تۋرالى مالىمدەگەن. بقو اكىمدىگىنە بارلىق سپورت الاڭدارىنىڭ قاۋىپسىزدىگىن تەكسەرۋ قاجەتتىگى تۋرالى ۇسىنىس ەنگىزىلدى. بقو پروكۋرورىنا جانە بقو پد باستىعىنا انىقتالعان بۇزۋشىلىقتارعا بايلانىستى شارا قولدانۋ ءۇشىن قاۋلىلار شىعارىلدى.
قايتىس بولعان بالانىڭ اكەسى سوت شەشىمىمەن كەلىسپەي، اپەللياسيالىق شاعىم بەرۋدى جوسپارلاپ وتىر.