ورالدا سوت پوليسيانىڭ وقۋشى قىزدى ارنايى وقۋ ورنىنا جىبەرۋ ءوتىنىشىن قاناعاتتاندىرمادى. سەبەبى، قىزدىڭ ساباققا بارماۋى سىنىپتاستارىنىڭ قىسىمىنان بولعانى انىقتالدى، دەپ حابارلايدى infohub.kz.
باتىس قازاقستان وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى جەرگىلىكتى پوليسيانىڭ تالابىن قارادى. قۇقىق قورعاۋ ورگاندارى قىزدى دەۆيانتتى مىنەز-ق ۇلىقتى بالالارعا ارنالعان مەكتەپكە ورنالاستىرۋدى تالاپ ەتىپ، ونىڭ ساباققا جۇيەلى تۇردە قاتىسپاعانىن العا تارتتى.
الايدا سوت وتىرىسى بارىسىندا وزگە جاعدايلار انىقتالدى. وبلىستىق سوتتىڭ مالىمەتىنشە، وقۋشى قىز ساباققا بۋللينگكە بايلانىستى بارماعانىن ايتقان. مەكتەپتەگى تۇراقتى قىسىم ونىڭ ەموسيونالدىق جاعدايىنا كەرى اسەر ەتىپ، ساباققا بارۋعا ەرىك-جىگەرى بولماعان. بۇل دالەلدەردى پروكۋرور دا قولدادى.
سوت «قۇقىق بۇزۋشىلىقتاردىڭ الدىن الۋ تۋرالى» زاڭدى ەسكە سالىپ، وقۋ ورىندارى ءقاۋىپسىز ورتا قۇرۋعا جانە بۋللينگكە تاپ بولعان بالالارعا پسيحولوگيالىق كومەك كورسەتۋگە مىندەتتى ەكەنىن اتاپ ءوتتى.
سۋديا ساباققا قاتىسپاۋدىڭ ناقتى سەبەپتەرىن انىقتاماي، بالانى ارنايى مەكتەپكە جىبەرۋگە نەگىز جوق دەپ شەشىپ، پوليسيانىڭ تالابىن قابىلدامادى.
سونىمەن قاتار، سوت پوليسيا دەپارتامەنتى مەن ءبىلىم باسقارماسىنا جەكەشە قاۋلى شىعارىپ، بۋللينگتىڭ الدىن الۋ جۇمىستارىنىڭ جەتكىلىكسىزدىگىن جانە قىزدىڭ شاعىمدارىنىڭ ەلەنبەگەنىن كورسەتتى.
شەشىم ءالى زاڭدى كۇشىنە ەنگەن جوق.