قازاقستاندا تامىز ايىنىڭ باسىندا جيىنتىق زەينەتاقىنىڭ ورتاشا مولشەرى 200 مىڭ تەڭگەگە جۋىقتادى، بۇل رەتتە سومانىڭ جارتىسىنان استامى ىنتىماقتى تولەمگە تيەسىلى، دەپ حابارلايدى infohub.kz سايتى.
قازاقستاندىقتاردىڭ زەينەتاقىسى بىرنەشە قۇرامداس بولىكتەن تۇرادى: بازالىق، ىنتىماقتى جانە جيناقتاۋشى. 2026 جىلدان باستاپ ولاردىڭ ەڭ تومەنگى مولشەرى 10 پايىزعا ۇلعايتىلدى. ماسەلەن، بازالىق زەينەتاقى ءقازىر كەمىندە 35 596 تەڭگەنى قۇرايدى، ىنتىماقتى زەينەتاقى تولىق كولەمدە 69 049 تەڭگە، ال ءبىرىڭعاي جيناقتاۋشى زەينەتاقى قورىنان (بجزق) تولەم دە 35 596 تەڭگەنى قۇرايدى.
بجزق-دان تولەمنىڭ ەڭ جوعارى مولشەرى شەكتەلمەگەن، بازالىق زەينەتاقىدا ول 60 005 تەڭگەگە، ال ىنتىماقتىدا 178 407 تەڭگەگە تەڭ. ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرىنە سايكەس، بيىل بازالىق جانە ىنتىماقتى تولەمدەردىڭ بىرگە ەڭ جوعارى مولشەرى 238 412 تەڭگەنى قۇرايدى.
2026 جىلعى 1 تامىزداعى جاعداي بويىنشا جيىنتىق زەينەتاقىنىڭ ورتاشا مولشەرى 197 446 تەڭگەنى قۇرادى، ونىڭ ىشىندە ىنتىماقتى – 103 389 تەڭگە، بازالىق – 54 034 تەڭگە، جيناقتاۋشى – 40 043 تەڭگە. زەينەتكەرلەر سانى 2 589 286 ادامدى قۇرايدى.
2026 جىلى مەملەكەتتىك بيۋدجەتتەن زەينەتاقى تولەمدەرىنە 4،9 ترلن تەڭگە جوسپارلانعان، ونىڭ ىشىندە ىنتىماقتى بولىككە 3،2 ترلن تەڭگە جانە بازالىق بولىككە 1،6 ترلن تەڭگە قاراستىرىلعان.
بۇعان دەيىن قازاقستاندىقتاردىڭ بجزق-داعى زەينەتاقى شوتتارىندا 28 ترلن تەڭگەدەن استام قاراجات ساقتالاتىنى، وسى قاراجاتتىڭ جارتىسىنا جۋىعى ينۆەستيسيالىق كىرىس ەكەنى حابارلانعان بولاتىن.