پاۆلودار وبلىسىندا 15 تامىزدا ىزدەۋلى بولعان 47 جاستاعى ەر ادامدى ىزدەۋ اياقتالدى. بۇگىن ونىڭ ءمايىتىن قۇتقارۋشىلار ەرتىس وزەنىنەن تاپتى، دەپ حابارلايدى infohub.kz سايتى.
1979 جىلى 28 شىلدەدە تۋعان يۋري سولداتەنكونى ىزدەۋ تۋرالى اقپاراتتى ۆولونتەرلەر تاراتتى. ەر ادام 2026 جىلى 15 تامىزدا ساعات 11:40 شاماسىندا سىچەۆكا اۋىلىنىڭ ماڭىنداعى ەرتىس وزەنىندە بولعانى ايتىلدى. سول ۋاقىتتان بەرى ونىڭ قايدا ەكەنى بەلگىسىز بولدى.
«ەر ادامنىڭ تۋىستارى ونىڭ ءتىرى ەكەنىنە ۇمىتتەنەدى»، — دەپ كورسەتتى ۆولونتەرلەر.
بۇگىن وبلىستىق تجد ماماندارى پاۆلودار اۋدانىندا قۇتقارۋشىلار ىزدەۋلى بولعان ادامنىڭ ءمايىتىن تاپقانىن حابارلادى.
«18 تامىزدا سىچەۆكا اۋىلىنىڭ ماڭىنداعى ەرتىس وزەنىندە وسو قۇتقارۋشىلارى 1979 جىلى تۋعان ەر ادامنىڭ ءمايىتىن تاۋىپ، سۋدان شىعاردى. الدىن الا مالىمەت بويىنشا، ول 15 تامىزدا شومىلۋعا تىيىم سالىنعان جەردە شومىلۋ كەزىندە سۋعا باتىپ كەتكەن»، — دەدى ۆەدومستۆونىڭ ءباسپاسوز قىزمەتى.
پاۆلودار وبلىستىق تجد ماماندارى ءتورت كۇندىك ىزدەۋ جۇمىستارى بارىسىندا قۇتقارۋشىلار قايىقپەن ەرتىس وزەنىنىڭ وڭ جانە سول جاعالاۋىنىڭ 83 شاقىرىمىن تەكسەرگەنىن اتاپ ءوتتى. ەحولوت كومەگىمەن اكۆاتوريانىڭ 16 900 شارشى مەترى زەرتتەلدى. جاعالاۋ سىزىعىنىڭ 10 شاقىرىمى جاياۋ ءجۇرىپ ءوتىلدى. سۇڭگۋىرلەر 34 نۇكتەلىك سۇڭگۋ جاساپ، وزەن ءتۇبىنىڭ 3 400 شارشى مەترىن تەكسەردى.