اباي وبلىسىندا بىرنەشە جىل بويى كورمەگەن بەس جاسار قىزىمەن سوتتالعان ازاماتتىڭ كوپتەن كۇتكەن كەزدەسۋى ءوتتى، دەپ حابارلايدى infohub.kz سايتى.
وبلىس بويىنشا قاجد ءباسپاسوز قىزمەتىنىڭ مالىمەتىنشە، پاۆلوداردىڭ 45 جاستاعى تۇرعىنى ەسىرتكى ساقتاعانى جانە وتكىزگەنى ءۇشىن جەتى جىلعا باس بوستاندىعىنان ايىرىلعان. جازاسىن وتەۋ ءۇشىن ول ورتاشا قاۋىپسىزدىك مەكەمەسىنە جىبەرىلگەن. كەيىننەن ۇلگىلى مىنەز-قۇلقى، ەڭبەككە ادال قاتىناسى جانە رەجيم تالاپتارىن ساقتاعانى ءۇشىن سوتتالعان ادام اباي وبلىسى بويىنشا قاجد مينيمالدى قاۋىپسىزدىك مەكەمەسىنە اۋىستىرىلعان.
مينيمالدى قاۋىپسىزدىك مەكەمەسىندە سوتتالعان ازامات قالانى اباتتاندىرۋمەن اينالىساتىن كاسىپورىنداردىڭ بىرىنە جۇمىسقا ورنالاستىرىلعان. مەكەمە قىزمەتكەرلەرىمەن اڭگىمەلەسۋ كەزىندە ول وتباسىنىڭ اۋىر تاعدىرى مەن قىزىمەن كەزدەسۋدى جىلدار بويى كۇتكەنىن ايتىپ بەرگەن.
«بوستاندىقتان ايىرىلعانعا دەيىن مەنىڭ وتباسىم بولعان - ايەلىم جانە كىشكەنتاي قىزىم. مەن سوتتالعاننان كەيىن ايەلىم اجىراسۋعا ءوتىنىش بەرىپ، ءبىر جاسار قىزىمدى انامنىڭ تاربيەسىنە قالدىردى. دەنساۋلىعىنا بايلانىستى انام بالانى جالعىز تاربيەلەي الماي، نەمەرەسىن بالالار ۇيىنە بەرۋگە ءماجبۇر بولدى. كەيىن قىزىمنىڭ جۇرەك اقاۋى بار ەكەنىن جانە ەمدەلۋ قاجەت ەكەنىن ءبىلدىم. مەكەمەگە كەلگەنىمدە، اكىمشىلىك ماعان جۇمىسقا ورنالاسۋعا كومەكتەستى. تۇراقتى جالاقى الىپ، تاپقان اقشامنىڭ بارلىعىن دەرلىك قىزىمنىڭ ەمىنە جىبەردىم. قاشىقتىققا قاراماستان وعان قامقورلىق جاساپ، كومەكتەسۋ مەن ءۇشىن ماڭىزدى بولدى. ءقازىر قىزىم بەس جاستا. وسى جىلدار بويى ءبىز بايلانىستا بولدىق، ءجيى تەلەفونمەن سويلەسىپ، كەزدەسۋ كۇنىن بىرگە سانادىق. مىنە، سول كۇن دە كەلدى. ۇزاق ساپاردان كەيىن قىزىمدى كورىپ، قۇشاقتاپ، جانىمدا بولا الدىم. بۇل مەن ءۇشىن وتە ماڭىزدى ءسات. ونىمەن كەزدەسۋ مۇمكىندىگى ءۇشىن ريزامىن جانە بولاشاقتا قىزىمنىڭ جانىندا بولا الامىن جانە جاڭا ءومىر باستايمىن دەپ ۇمىتتەنەمىن»، - دەدى سوتتالعان ادام.
«ءبىزدىڭ جۇمىسىمىزدىڭ ماڭىزدى مىندەتتەرىنىڭ ءبىرى - سوتتالعانداردىڭ جاقىندارىمەن الەۋمەتتىك پايدالى بايلانىستارىن ساقتاۋ جانە نىعايتۋ. بۇل جاعدايدا جۇمىسقا ورنالاسۋ ەر ادامعا پايدالى ەڭبەك داعدىلارىن مەڭگەرىپ، بەلگىلەنگەن ءتارتىپتى ساقتاۋعا عانا ەمەس، سونىمەن قاتار قىزىنا قارجىلاي كومەك كورسەتۋگە مۇمكىندىك بەردى. ول ءۇشىن بالامەن بايلانىستى ساقتاپ، جەكە كەزدەسۋدى كۇتۋدىڭ قانشالىقتى ماڭىزدى بولعانىن كورىپ وتىرمىز»، - دەپ اتاپ ءوتتى مەكەمە باستىعىنىڭ مىندەتىن اتقارۋشى رۋستەم بەرليبەكوۆ.