پاۆلوداردىڭ 44 جاستاعى تۇرعىنى، ءبىرىنشى توپتاعى كورۋ قابىلەتى بويىنشا مۇگەدەك مادينا ءابدىعازيزوۆا ۇزاق ۋاقىت بويى رەسمي جۇمىس تابا الماي ءجۇر، دەپ حابارلايدى infohub.kz سايتى.
پاۆلودارلىق ايەل رەسمي جۇمىس ىستەگىسى كەلەتىنىن، ديپلومى بار ەكەنىن، ءبىراق ازىرگە كەزدەيسوق تابىسقا قاناعاتتانۋعا تۋرا كەلەتىنىن ايتادى. «بيىل مەن "مەيىربيكە ءىسى" ماماندىعى بويىنشا جوعارى مەديسينالىق كوللەدجدى ءبىتىردىم، ماسساجيست بىلىكتىلىگى بار، گرانت بويىنشا وقىدىم، ستيپەنديا الدىم. مەن 20 جىلدان بەرى ماسساجبەن اينالىسامىن. 1999 جىلى كۋرستاردى ءبىتىردىم، ەندى جۇمىسقا ورنالاسقىم كەلگەندە، ماعان مەديسينالىق ءبىلىم كەرەك دەدى. ءقازىر مەندە مەديسينالىق ءبىلىم بار، بارلىق قۇجاتتارىم بار. ۇلكەن ءوتىنىش - مەنى تىڭداڭىزدار! مەن جۇمىس ىستەگىم كەلەدى»، - دەدى مادينا ءابدىعازيزوۆا.
ول ۇلىمەن بىرگە جالدامالى پاتەردە تۇرادى. مۇگەدەكتىگى مەن اسىراۋشىسىنان ايىرىلۋى بويىنشا بەرىلەتىن 158 مىڭ تەڭگە جاردەماقىعا ارەڭ جەتەتىنىن ايتادى. «مەن پاۆلودارداعى حالىقتى جۇمىسپەن قامتۋ ورتالىعىنا جۇگىندىم، ەسەپكە تۇردىم، ءبىراق ەشقانداي ناتيجە جوق. ەمدىك ماسساج، بالالار ماسساجى، اپپاراتتىق ماسساج جاسايمىن. مەندە سويلەيتىن تونومەتر بار، ونى ينتەرنەت-دۇكەننەن ساتىپ الدىم. قارت ادامدارعا ماسساج جاساماس بۇرىن، قان قىسىمىن ولشەيمىن. مەملەكەت ماعان نوۋتبۋك بەردى، تەلەفون بەردى، ءبارى بار، ماعان تەك ءومىر ءسۇرۋ ءۇشىن جۇمىس ىستەۋ كەرەك»، - دەدى پاۆلودارلىق.
پاۆلودارداعى مانساپ ورتالىعىندا قازىرگى ۋاقىتتا ولاردا جۇمىسسىز رەتىندە 185 مۇگەدەك ادام تىركەلگەنىن اتاپ ءوتتى. ءقازىر مۇمكىندىگى شەكتەۋلى جانداردى جۇمىسپەن قامتۋ بويىنشا 69 ۇيىم كىرگەن ءتىزىم بەكىتىلگەن، وندا بارلىعى 212 كۆوتالىق ورىن قاراستىرىلعان. جۇمىس ءارتۇرلى. نەگىزىنەن ءبىلىم بەرۋ جانە دەنساۋلىق ساقتاۋ ۇيىمدارىندا.
«ەگەر مادينا ءابدىعازيزوۆاعا قاتىستى ايتاتىن بولساق، ءبىز بۇل سەكتوردا بىرنەشە رەت جۇمىس ۇسىندىق، ول جولداما الدى، بۇل ساۋىقتىرۋ كەشەنى. ءقازىر ول رەزەرۆتە، وعان جۇمىسقا ورنالاسۋعا كومەكتەسۋ ءۇشىن سۋبسيديالاناتىن جۇمىس ورنىن قاراستىرۋدى جوسپارلاپ وتىرمىز. ءوز تاراپىمىزدان وعان بارىنشا كومەكتەسۋگە تىرىسامىز»، - دەدى پاۆلودارداعى مانساپ ورتالىعىنىڭ ديرەكتورى قارلىعاش اسايموۆا.
سونداي-اق مۇندا كۇن سايىن ەڭبەك نارىعىن جانە جۇمىس بەرۋشىلەردىڭ وزەكتى بوس جۇمىس ورىندارىن باقىلاپ وتىراتىنىن قوستى. جالپى جىل باسىنان بەرى 54 مۇگەدەك ادام تۇراقتى جۇمىس ورىندارىنا، 12ء-سى كۆوتالىق ورىندارعا رەسىمدەلدى. مادينا ءابدىعازيزوۆا جاقىن ارادا ءوزى دە وسى تىزىمگە ەنەتىنىنە ۇمىتتەنەدى.