قازاقستاندا بوساندىرۋ كومەگىن كورسەتەتىن ۇيىمدارعا اۋقىمدى تەكسەرۋ جۇرگىزىلىپ، ونىڭ بارىسىندا 29 مەكەمەدە بۇزۋشىلىقتار انىقتالدى. infohub.kz سايتىنىڭ حابارلاۋىنشا، دەنساۋلىق ساقتاۋ مينيسترلىگى وسىنداي 84 مەكەمەنىڭ 82ء-سىن، ونىڭ ىشىندە 35 پەريناتالدىق ورتالىق پەن 47 بوساندىرۋ بولىمشەسىن تەكسەرگەن.
ماماندار ينفەكسيالىق قاۋىپسىزدىك تالاپتارىنىڭ ساقتالۋىن باعالاپ، زارارسىزداندىرۋ جانە دەزينفەكسيا جۇيەلەرىن، جەلدەتۋ مەن سۋمەن جابدىقتاۋدى، سونداي-اق ينفەكسيالاردى انىقتاۋ ءتارتىبى مەن ينفەكسيالىق باقىلاۋ قىزمەتتەرىنىڭ جۇمىسىن تەكسەردى. زەرتحانالىق زەرتتەۋلەر دە جۇرگىزىلىپ، بۇل قۇجاتتامانى عانا ەمەس، مەديسينالىق كومەك كورسەتۋدىڭ ناقتى جاعدايلارىن دا باعالاۋعا مۇمكىندىك بەردى.
تەكسەرۋ قورىتىندىسى بويىنشا 81 سانيتارلىق نۇسقاما بەرىلدى. دەزينفەكسيالىق-زارارسىزداندىرۋ رەجيمىنىڭ بۇزىلۋى 29 مەديسينالىق ۇيىمدا تىركەلدى. تاۋەكەلدەردى دەرەۋ جويۋدى تالاپ ەتەتىن فاكتىلەر بويىنشا ناقتى شارالار قابىلدانعانى ايتىلعان.
دەنساۋلىق ساقتاۋ ۆيسە-مينيسترى تيمۋر سۇلتانعازييەۆ وڭىرلەردىڭ دەنساۋلىق ساقتاۋ باسقارمالارىنا نۇسقامالاردىڭ ورىندالۋىن اي سايىن باقىلاۋدى قامتاماسىز ەتۋدى جانە بوساندىرۋ مەكەمەلەرىنىڭ سانيتارلىق-تەحنيكالىق جاعدايىن بەلگىلەنگەن تالاپتارعا سايكەستەندىرۋدى تاپسىردى. سونداي-اق ينفەكسيالىق باقىلاۋ قىزمەتتەرىنىڭ كادرلىق قامتاماسىز ەتىلۋىن كۇشەيتۋ، ينفەكسيالاردىڭ الدىن الۋ باعدارلامالارىن جاڭارتۋ جانە مەديسينالىق ۇيىمدار باسشىلارىنىڭ جەكە جاۋاپكەرشىلىگىن ارتتىرۋ تاپسىرىلدى.
«ءبىزدىڭ مىندەتىمىز – بۇزۋشىلىقتى انىقتاپ، نۇسقاما بەرۋ عانا ەمەس. ءبىر ايدان كەيىن قايتا ورالىپ، ناقتى ناتيجەنى كورۋىمىز كەرەك. ەگەر ەسكەرتۋ جاسالسا، ول جويىلۋى ءتيىس. پاسيەنتتىڭ قاۋىپسىزدىگى ەسەپتەرمەن ەمەس، مەديسينالىق كومەك كورسەتۋدىڭ ناقتى جاعدايلارىمەن راستالۋى كەرەك»، – دەپ اتاپ ءوتتى تيمۋر سۇلتانعازييەۆ.
كەلەسى كەزەڭدە بالالار اۋرۋحانالارى تەكسەرىلەدى، ودان كەيىن العاشقى مەديسينالىق-سانيتارلىق كومەك ۇيىمدارىندا دا وسىنداي جۇمىس جۇرگىزىلەدى.