شەتەلدىك قۇرىلىمدارعا تيەسىلى «پوتەنسيال ويل» مۇناي ءوندىرۋ كومپانياسى ەكولوگيالىق زاڭنامانى بۇزعانى ءۇشىن مەملەكەتكە 1،43 ملرد تەڭگە اكىمشىلىك ايىپپۇل تولەدى. ايىپپۇلداردى سوتتا داۋلاۋ ارەكەتتەرى ناتيجەسىز اياقتالدى — ءبىرىنشى جانە اپەللياسيالىق ساتىداعى سوتتار شاعىمداردى قاناعاتتاندىرۋسىز قالدىردى، دەپ حابارلايدى infohub.kz سايتى.
اتىراۋ وبلىسى بويىنشا ەكولوگيا دەپارتامەنتىنىڭ مالىمەتىنشە، ۆەدومستۆو كومپانيانىڭ ەكولوگيالىق تالاپتاردى ساقتاۋىن تەكسەرىپ، نىسانعا بارىپ پروفيلاكتيكالىق باقىلاۋ جۇرگىزدى. تەكسەرۋ قورىتىندىسى بويىنشا وندىرىستىك ەكولوگيالىق باقىلاۋ، اعىندى سۋلاردى مونيتورينگىلەۋ جانە ەكولوگيالىق ەسەپتىلىك تالاپتارىنىڭ بۇزىلعانى انىقتالدى.
سونىمەن قاتار تەكسەرۋشىلەر لاستاۋشى زاتتاردىڭ شىعارىندىلارى جانە ءتيىستى ەكولوگيالىق رۇقساتتارسىز جەكەلەگەن جۇمىستاردىڭ جۇرگىزىلۋى، رۇقسات ەتىلگەن شىعارىندىلار نورماتيۆتەرىنىڭ اسىپ كەتۋى، سونداي-اق قالدىقتاردى وڭدەۋ كەزىندەگى بۇزۋشىلىقتاردى انىقتادى.
كاسىپورىندا قاجەتتى رۇقساتتار مەن بەكىتىلگەن ليميتتەرسىز جينالعان لاستانعان توپىراق پەن تۇپتىك شلام دا تابىلدى. بۇعان قوسا، قالدىقتاردى باسقارۋ باعدارلاماسى تۇزىلەتىن قالدىقتاردىڭ ناقتى كولەمىنە سايكەس كەلمەدى.
بارلىعى دەپارتامەنت 37 اكىمشىلىك قۇقىق بۇزۋشىلىق تۋرالى حاتتاما تولتىرىپ، جالپى سوماسى 1 433 815 923 تەڭگەگە جەتەتىن جەتى ايىپپۇل قاۋلىسىن شىعاردى.
«پوتەنسيال ويل» قابىلدانعان شارالارعا سوت تارتىبىمەن شاعىمداندى. الايدا ءبىرىنشى جانە اپەللياسيالىق ساتىداعى سوتتار كومپانيانىڭ شاعىمدارىن قاناعاتتاندىرۋسىز قالدىردى. ناتيجەسىندە ايىپپۇلدىڭ بارلىق سوماسى — 1،4 ملرد تەڭگەدەن استامى — مەملەكەت كىرىسىنە ءوندىرىلىپ الىندى.
Adata دەرەكتەرىنە سايكەس، «پوتەنسيال ويل» قاتىسۋشىلارى — Datum Base Project Development-FZCO جانە First International Oil Corporation Limited S.À R.L. (FIOC). Datum Base Project Development-FZCO بىرىككەن اراب امىرلىكتەرىندە، ال FIOC ليۋكسەمبۋرگتە تىركەلگەن.
«پوتەنسيال ويل» نەگىزگى قىزمەت ءتۇرى — شيكى مۇناي جانە ىلەسپە گاز ءوندىرۋ. كومپانيانىڭ 2025 جىلعى قورىتىندىسى بويىنشا پايداسى 2،6 ملرد تەڭگە بولدى، بۇل وتكەن جىلعى 2،9 ملرد تەڭگەدەن از.
كومپانيانىڭ 2025 جىلعى 31 جەلتوقسانداعى ەسەپتىلىگىنە سايكەس، ونىڭ اكسيالارىنىڭ 80%-ى باا-دە تىركەلگەن Selford International FZCO-عا، تاعى 20%-ى FIOC-قا تيەسىلى بولعان. كومپانيانىڭ تۇپكىلىكتى باقىلاۋشى تاراپى رەتىندە ءازىربايجان جانە رەسەي ازاماتتارى — كانان حۋداۆەردييەۆ پەن ەدۋارد حۋدايناتوۆ كورسەتىلگەن.
«پوتەنسيال ويل» اتىراۋ وبلىسى يساتاي اۋدانىنداعى بەگايدار ۋچاسكەسىندە كومىرسۋتەك شيكىزاتىن بارلاۋ، ءوندىرۋ جانە بولۋگە 2001 جىلعى 4 ساۋىردەگى №651 كەلىسىمشارت، سونداي-اق تاۋ-كەن وندىرىستەرىن پايدالانۋعا 2006 جىلعى 24 مامىرداعى №0003738 باس ليسەنزياسى نەگىزىندە جۇمىس ىستەيدى.
مۇناي ساقتاۋ نىساندارى مەن ماگيسترالدىق مۇناي قۇبىرلارىن پايدالانۋدى كومپانيا 2033 جىلعى 15 ماۋسىمعا دەيىن قولدانىستاعى №000100-06 جانە №000113-06 ليسەنزيالارى بويىنشا جۇزەگە اسىرادى.
بۇدان بولەك، كاسىپورىن سول اتىراۋ وڭىرىندەگى جاڭاتالاپ-2 ۋچاسكەسىندە 2008 جىلعى 19 تامىزداعى №187/2008 كەلىسىمشارتقا سايكەس كەڭ تارالعان پايدالى قازبالاردى، اتاپ ايتقاندا سازدى جىنىستاردى وندىرۋمەن اينالىسادى.
بۇعان دەيىن «كۋرسيۆ» قازاقستان قاشاعان وپەراتورىنان 2،3 ترلن تەڭگە ايىپپۇل ءوندىرۋدى توقتاتقانىن جازعان بولاتىن.