قازاقستاندا ءدارىحانا جەلىسى ارقىلى 26 مىڭنان استام تەگىن دارىلىك پرەپارات قورابىنىڭ ساتىلعانى انىقتالدى. 60-تان استام ۇيىم اكىمشىلىك جاۋاپكەرشىلىككە تارتىلدى، دەپ حابارلايدى infohub.kz سايتى.
ۇكىمەتتە اتاپ وتكەندەي، سيفرلىق تاڭبالاۋ جانە قاداعالاۋ جۇيەسى ءاربىر پرەپارات قورابىنىڭ وندىرۋشىدەن ناۋقاسقا دەيىنگى جولىن باقىلاۋعا، سونداي-اق ەل بويىنشا ءدارى قورلارىن قاداعالاۋعا مۇمكىندىك بەرەدى.
«سيفرلىق باقىلاۋدىڭ ارقاسىندا ءدارىحانا جەلىسى ارقىلى 26 مىڭنان استام تەگىن دارىلىك پرەپارات قورابىنىڭ ساتىلعانى انىقتالدى. انىقتالعان فاكتىلەر بويىنشا 106 مەديسينالىق ۇيىم مەن ءدارىحاناعا تەكسەرۋ جۇرگىزىلدى. 60-تان استام ۇيىم اكىمشىلىك جاۋاپكەرشىلىككە تارتىلىپ، ايىپپۇلدىڭ جالپى سوماسى 20 ملن تەڭگەدەن استى. الدىن الا كەلتىرىلگەن شىعىن 36 ملن تەڭگەدەن اسادى دەپ باعالانىپ وتىر. ماتەريالدار قۇقىق قورعاۋ ورگاندارىنا جىبەرىلدى»، — دەدى دەنساۋلىق ساقتاۋ مينيسترلىگىنىڭ مەديسينالىق جانە فارماسەۆتيكالىق باقىلاۋ كوميتەتىنىڭ ءتوراعاسى باۋىرجان ءجۇسىپوۆ.
ايتا كەتەيىك، بيىلعى قىركۇيەكتەن باستاپ بيولوگيالىق بەلسەندى قوسپالار ءۇشىن دە سيفرلىق تاڭبالاۋ ەنگىزىلدى، ال 2027 جىلدان باستاپ ول مەديسينالىق ماقساتتاعى بۇيىمدارعا دا قولدانىلادى.