پاۆلودار، قاراعاندى، سونداي-اق ءىشىنارا اقمولا جانە قوستاناي وبلىستارىنىڭ ديقاندارى قولايسىز اۋا رايىنا تاپ بولدى — بيىلعى اپتاپ ىستىق پەن قۋاڭشىلىق كارتوپ ونىمىنە اسەر ەتتى. فەرمەرلەر ءونىم باعاسىنىڭ ىقتيمال ءوسۋىن بولجادى، دەپ حابارلايدى infohub.kz سايتى.

قازىرگى تاڭدا قاراعاندى وبلىسىندا جيناۋ جۇمىستارى ءجۇرىپ جاتىر، فەرمەرلەردىڭ بولجامدارى وڭ. ولاردىڭ ايتۋىنشا، ءونىم بىلتىرعىدان از بولعانىمەن، الدىڭعى جىلعىدان كوپ. كارتوپ ۇساق، الايدا ساقتالۋى جاقسىراق بولۋى ءتيىس.

«ءيا، قاراعاندى وبلىسى بويىنشا وسى 80 كۇندىك اپتاپ ىستىق بولدى. ول كارتوپ ءۇشىن ازداپ كۇيزەلىس تۋدىردى. دەگەنمەن، كوپتەگەن ارىپتەستەرىممەن سويلەسىپ ءجۇرمىن، ءونىم بار، كارتوپتىڭ ساپاسى وتە جاقسى»، — دەدى اگرونوم، «ەۆرازيا ينۆەست» ج ش س جانە «اگروكرەستيانسكي دۆور» ج ش س مەنەدجەرى الەكساندر ماتۆيەنكو.

ديقاندار تاپشىلىق بولمايدى دەپ ەسەپتەيدى، ويتكەنى كوپتەگەن فەرمەر كارتوپ ەگىستىك القاپتارىن ۇلعايتتى. اۋىل شارۋاشىلىعى مينيسترلىگى ازىرگە ەشقانداي ماسەلە كورىپ وتىرعان جوق. وندا ونىمدىلىك گەكتارىنا 26،4 توننا دەپ باعالانىپ وتىر.

«كارتوپ نەگىزىنەن سۋارمالى جەرلەردە وسىرىلەدى، سوندىقتان ونى ءوندىرۋ اۋىل شارۋاشىلىعى القاپتارىنىڭ سۋارۋ سۋىمەن قامتاماسىز ەتىلۋىنە تىكەلەي بايلانىستى. جالپى، بيىل سۋارۋعا قاجەتتى سۋ رەسۋرستارىنىڭ تاپشىلىعى بايقالعان جوق. جەرگىلىكتى اتقارۋشى ورگانداردىڭ دەرەگىنشە، ۆەگەتاسيا كەزەڭىندە كارتوپ ەگىسىنىڭ 100%-ى جاقسى جانە قاناعاتتانارلىق جاعدايدا بولدى»، — دەدى مينيسترلىكتە.

فەرمەرلەر كارتوپتى كەلىسىمىنە 100–110 تەڭگەدەن، ال قويماسى جوق كەيبىرەۋلەرى 80 تەڭگەدەن دە ساتىپ جاتىر. اگراريلەرگە قوسىلعان قۇن سالىعىنىڭ ءوسۋى دە اسەر ەتتى. كوبىسى تاپسىرىس بەرگەن تەحنيكاسىن ساتىپ الۋ ءۇشىن جىل باسىندا قوسىمشا نەسيە العان.

«كوپشىلىك ءقازىر سالىق پەن نەسيە جۇكتەمەسىن ازايتۋ ءۇشىن نەسيەلەرىن جابۋعا تىرىسۋدا. ولار كارتوپتى تومەندەتىلگەن باعامەن ساتىپ جاتىر. مەنىڭ ۇيىمدە دۇكەن بار، قاراپايىم ساۋدا دۇكەنى، وندا سۇرىپتالعان كارتوپ كەلىسىنە 300 تەڭگەدەن ساتىلادى. ال وسى دۇكەنگە جەتكىزىپ وتىرعان شارۋاشىلىق 100 تەڭگەدەن بەرەتىنىن ناقتى بىلەمىن. وسى 200 تەڭگە قايدان، قاي كەزەڭدە شىقتى؟» — دەدى قازاقستان كارتوپ جانە كوكونىس وسىرۋشىلەر وداعىنىڭ ءتوراعاسى بايجان ۋاليحانوۆ.

فەرمەرلەردىڭ بارلىعى دەرلىك دەلدالدار ارقىلى جۇمىس ىستەيدى، كەيدە ولاردىڭ سانى 3–4 بۋىنعا جەتەدى. شارۋالاردىڭ ءوز لوگيستيكالىق كومپانياسىن قۇرىپ، سۋپەرماركەتتەرگە شاعىن پارتيامەن تاسىمالداۋ مۇمكىندىگى جوق. كارتوپ وسىرۋشىلەر وداعى مەملەكەت باعانى رەتتەۋگە كىرىسسە، دەلدالدارعا نازار اۋداراتىن ۋاقىت كەلدى دەپ ەسەپتەيدى.