قوستاناي تۇرعىنى 955 مىڭ تەڭگەگە جيھاز تاپسىرىس بەرىپ، 684 مىڭ تەڭگەسىن الدىن الا تولەگەن. الايدا تاپسىرىس ورىندالماي، داۋ سوتتا مەدياسيالىق كەلىسىممەن اياقتالدى، دەپ حابارلايدى infohub.kz سايتى.
قوستاناي وبلىسى سوتتارىنىڭ رەسمي Telegram-ارناسىندا حابارلانعانداي، قوستاناي قالالىق سوتى ايەلدىڭ جەكە كاسىپكەرگە قارسى شارتتى بۇزۋ، اقشا ءوندىرۋ، ءوسىمپۇل جانە مورالدىق زياندى وتەۋ تۋرالى تالاپ ارىزى بويىنشا ازاماتتىق ءىستى قارادى.
سوت تاراپتار اراسىندا كورپۋستىق جيھاز جاساۋعا شارت جاسالعانىن انىقتادى. شارت بويىنشا تاپسىرىس قۇنى 955 مىڭ تەڭگە، ال جاساۋ مەرزىمى 25 كۇن بولعان.
شارت تالاپتارىن ورىنداۋ ءۇشىن تالاپ قويۋشى 684 مىڭ تەڭگە تولەدى. الايدا جاۋاپكەر بەلگىلەنگەن مەرزىمدە بۇيىمدى جاساپ، تاپسىرۋ مىندەتتەمەسىن ورىندامادى.
تالاپ قويۋشى جاۋاپكەرگە شارتتىق مىندەتتەمەلەردى ورىنداۋدى نە اقشانى قايتارۋدى بىرنەشە رەت تالاپ ەتتى. كەيىن جاۋاپكەر 400 مىڭ تەڭگەسىن قايتاردى. قالعان قارىز سوماسى 284 مىڭ تەڭگەنى قۇرادى.
شارتتىق مىندەتتەمەلەردىڭ تيىسىنشە ورىندالماۋىنا بايلانىستى تالاپ قويۋشى سوتقا جۇگىنىپ، ءوسىمپۇل مەن مورالدىق زياندى وتەۋدى دە سۇرادى.
ءىستى قاراۋ بارىسىندا تاراپتار داۋدى مەدياسيا تارتىبىمەن رەتتەۋ تۋرالى كەلىسىمگە كەلدى.
سوت بەكىتكەن كەلىسىم بويىنشا تالاپ قويۋشى جاۋاپكەر كەلىسىلگەن مىندەتتەمەلەردى ورىنداعان جاعدايدا ءوز تالاپتارىنان باس تارتتى.
جاۋاپكەر تالاپ قويۋشىعا قارىز سوماسى مەن وكىل شىعىستارىن قوسا العاندا 434 مىڭ تەڭگەدەن استام اقشا تولەۋگە مىندەتتەندى.
مىندەتتەمەلەر ۋاقتىلى ورىندالماعان جاعدايدا كەلىسىمدە قارىزدى ماجبۇرلەپ ءوندىرۋ، سونداي-اق 42 مىڭ تەڭگەدەن استام ءوسىمپۇل مەن 150 مىڭ تەڭگە مورالدىق زياندى وتەۋ كوزدەلگەن. بۇل جاعدايدا جالپى مىندەتتەمە سوماسى 627 مىڭ تەڭگەدەن اسادى.
سوت كەلىسىم شارتتارىن تەكسەرىپ، ول زاڭ تالاپتارىنا قايشى كەلمەيتىنىن جانە تاراپتاردىڭ قۇقىقتارى مەن زاڭدى مۇددەلەرىن بۇزبايتىنىن انىقتادى.
داۋدى مەدياسيا تارتىبىمەن رەتتەۋ تۋرالى كەلىسىم سوتپەن بەكىتىلىپ، ازاماتتىق ءىس بويىنشا ءىس جۇرگىزۋ توقتاتىلدى.