قازاقستاندا قۇرىلىس سالاسىنداعى جەكە كاسىپكەرلەردى ءوزىن-وزى جۇمىسپەن قامتىعاندار مارتەبەسىنە اۋىستىرۋ تالقىلانىپ جاتىر. ونەركاسىپ مينيسترلىگىنىڭ قۇرىلىس ىستەرى جونىندەگى كوميتەتىنىڭ ءتوراعاسى ۆەدومستۆو وسىنداي مۇمكىندىكتى پىسىقتاپ جاتقانىن مالىمدەدى. الايدا ونىڭ ايتۋىنشا، بۇل سالىنىپ جاتقان باسپانا قۇنىنا اسەر ەتپەيدى، دەپ حابارلايدى infohub.kz سايتى.
ورتالىق كوممۋنيكاسيالار قىزمەتىندە وتكەن بريفينگتە جۋرناليستەر قۇرىلىس سالاسىنداعى جەكە كاسىپكەرلەردىڭ جۇمىسىنداعى قيىندىقتارعا نازار اۋداردى. ولار نەعۇرلىم كۇردەلى سالىق رەجيمىنە كوشۋگە ءماجبۇر، ويتكەنى ولاردىڭ تاپسىرىس بەرۋشىلەرى — ءىرى قۇرىلىس كومپانيالارى — وڭايلاتىلعان رەجيمدەگى مەردىگەرلەردىڭ قىزمەتىنە جۇمسالعان شىعىنداردى كورپوراتيۆتىك تابىس سالىعىن ەسەپتەۋ كەزىندە ەسەپكە الا المايدى. ساراپشىلاردىڭ باعالاۋىنشا، بۇل باسپانا قۇنىنىڭ قىمباتتاۋىنا اكەلەدى.
بۇعان دەيىن قۇرىلىسشىلار قاۋىمداستىعى قۇرىلىس قىزمەتىنىڭ 12 ءتۇرىن ءوزىن-وزى جۇمىسپەن قامتىعاندارعا رۇقسات ەتىلگەن تىزىمگە قوسۋدى ۇسىنعان بولاتىن. ب ا ق وكىلدەرى ونەركاسىپ مينيسترلىگى وسى ماسەلەنى قاراستىرىپ جاتقانىن سۇرادى.
ونەركاسىپ جانە قۇرىلىس مينيسترلىگى قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى باقىتجان جۇنىسبەكوۆ ۆەدومستۆونىڭ شىنىمەن دە وسىنداي ۇسىنىستى قاراستىرىپ جاتقانىن راستادى.
«بۇل جەردە ەڭ الدىمەن مىنانى ءتۇسىنۋ كەرەك: بۇل تەتىك شارشى مەتردىڭ قۇنىنا اسەر ەتپەيدى. نەگە؟ ويتكەنى كەز كەلگەن جاعدايدا سالىق تولەۋشى رەتىندە قۇرىلىس سالۋشى ققس-تى تولىق كولەمدە تولەيدى. ول سالىق تولەمەيتىنمەن جۇمىس ىستەي مە، الدە تولەۋشىمەن بە — ماڭىزدى ەمەس. ەكىنشىدەن، پىسىقتاۋ ءجۇرىپ جاتىر. ءيا، ءبارى دۇرىس، مۇنداي ۇسىنىستار ءتۇستى»، — دەدى باقىتجان جۇنىسبەكوۆ.
كوميتەت ءتوراعاسىنىڭ ايتۋىنشا، ولار بۇل ماسەلە بويىنشا ەكونوميكا مينيسترلىگىنىڭ ۇستانىمىن ءالى العان جوق، قۇرىلىسشىلاردى ءوزىن-وزى جۇمىسپەن قامتىعاندار قاتارىنا قوسۋ تۋرالى ۇسىنىس ازىرگە جۇمىس بارىسىندا.
بۇعان دەيىن قازاقستان قۇرىلىسشىلار وداعى ەلىمىزدە قۇرىلىس سالاسىنداعى جەكە كاسىپكەرلەردىڭ سانى قىسقارىپ جاتقانىن مالىمدەگەن. ءبىر جىلدا ولاردىڭ سانى شامامەن 11%-عا ازايدى. بۇل ءىرى قۇرىلىس كومپانيالارىمەن جۇمىس ىستەۋدەگى سالىق وزگەرىستەرىمەن بايلانىستىرىلدى. قازاقستان رەسپۋبليكاسى قۇرىلىسشىلار وداعى پرەزيدەنتىنىڭ ورىنباسارى ۆياچەسلاۆ لازارەۆتىڭ باعالاۋىنشا، وڭايلاتىلعان رەجيمدە جۇمىس ىستەيتىن مەردىگەرلەردىڭ قۇرىلىس كومپانيالارى قۇرىلىمىنداعى ۇلەسى 15%-دان 50%-عا دەيىن بولۋى مۇمكىن. ول سونداي-اق بۇل جۇمىستاردىڭ 10-15%-عا قىمباتتاۋىنا اكەلگەنىن مالىمدەدى.