قىزىلوردادا پوليسيا قىزمەتكەرلەرى جول ءجۇرۋ ەرەجەلەرىن ورەسكەل بۇزعان ۇيلەنۋ تويىنىڭ كورتەجىن توقتاتتى. جۇرگىزۋشىلەر جاۋاپكەرشىلىككە تارتىلدى، دەپ حابارلايدى infohub.kz سايتى.
قىزىلوردا وبلىسى پوليسيا دەپارتامەنتىنىڭ مالىمەتىنشە، جەدەل-باقىلاۋ ورتالىعىنىڭ قىزمەتكەرلەرى بەينەكامەرالار ارقىلى قالا ورتالىعىندا جول ەرەجەسىن ورەسكەل بۇزعان ۇيلەنۋ شەرۋىنىڭ كولىكتەرىن انىقتادى. دەرەكتەر پاترۋلدىك ەكيپاجدارعا جەدەل جەتكىزىلدى.
«ناتيجەسىندە شەرۋگە قاتىسقان بارلىق كولىك جۇرگىزۋشىلەرى توقتاتىلىپ، پوليسياعا جەتكىزىلدى. 33 حاتتاما تولتىرىلىپ، 12 بۇزۋشىعا ايىپپۇل سالىندى. 10 كولىك ارنايى تۇراققا قويىلدى»، — دەلىنگەن حابارلامادا.
تەكسەرۋ بارىسىندا قارسى جولاققا شىعۋ، ءقاۋىپتى مانەۆرلەر جاساۋ، كولىك جۇرگىزۋ كەزىندە تەلەفون پايدالانۋ، قاۋىپسىزدىك بەلدىگىن تاقپاۋ جانە جول ەرەجەلەرىن بۇزۋدىڭ باسقا دا فاكتىلەرى انىقتالدى.
«پوليسيا ازاماتتاردى جول ءجۇرۋ ەرەجەلەرىن قاتاڭ ساقتاۋعا شاقىرادى. توي نەمەسە باسقا دا مەرەكەلىك شارالار جولدا ءقاۋىپتى جاعداي تۋعىزۋعا سەبەپ بولا المايدى. شەرۋلەردىڭ جولدا ەشقانداي ارتىقشىلىعى جوق، زاڭ تالاپتارىن بۇزعان اركىم جاۋاپكەرشىلىككە تارتىلادى»، — دەپ ەسكە سالدى پوليسيا.