شىعىس قازاقستان وبلىسىنداعى اتى اڭىزعا اينالعان «راحمانوۆ بۇلاقتارى» شيپاجايى تاعى دا قوجايىنىن اۋىستىردى: ەندى ول «شىعىس قازاقستان وبلىسىنىڭ مەملەكەتتىك-جەكەشەلىك ارىپتەستىك ورتالىعى» اكسيونەرلىك قوعامىنىڭ بالانسىندا تۇر. قاڭىراپ قالعان شيپاجايدىڭ قالاي قالپىنا كەلتىرىلىپ جاتقانىن كومپانيا «كۋرسيۆ» باسىلىمىنا ايتىپ بەردى، دەپ حابارلايدى infohub.kz سايتى.
ەسكە سالايىق، شيپاجاي 2024 جىلى «بيپەك اۆتو كازاحستان» توبىنىڭ اكتيۆتەرى مەن ونىڭ بۇرىنعى يەسى اناتولي بالۋشكينگە قاتىستى جانجالدى سوت ىستەرىنەن كەيىن مەملەكەت مەنشىگىنە وتكەن بولاتىن. سوندا كۋرورتتىڭ العاشقى يەسى شىعىس قازاقستان وبلىسىنىڭ كاسىپكەرلىك جانە يندۋستريالىق-يننوۆاسيالىق دامۋ باسقارماسى بولدى.
الايدا 2025 جىلدىڭ سوڭىندا تۋريزم جانە سپورت ءمينيسترى ەربول مىرزابوسىنوۆ «راحمانوۆ بۇلاقتارى» پرەزيدەنت ىستەرىن باسقارۋ باسقارماسىنىڭ قاراۋىندا ەكەنىن مالىمدەدى.
كەيىن شيپاجاي قايتادان جەرگىلىكتى شەنەۋنىكتەرگە قايتارىلىپ، شىعىس قازاقستان وبلىسىنىڭ كاسىپكەرلىك جانە ونەركاسىپ باسقارماسىنىڭ بالانسىنا بەكىتىلگەنى بەلگىلى بولدى.
ەندى ول «شىعىس قازاقستان وبلىسىنىڭ مەملەكەتتىك-جەكەشەلىك ارىپتەستىك ورتالىعى» اق قاراۋىندا. كومپانيا وڭىرگە جەكە ينۆەستيسيالار تارتۋمەن اينالىسادى.
شىعىس قازاقستان وبلىسىنىڭ مەملەكەتتىك-جەكەشەلىك ارىپتەستىك ورتالىعىنىڭ دەرەگىنشە، ءقازىر كۋرورت اۋماعىندا عيماراتتار مەن ينجەنەرلىك جەلىلەر تەكسەرىلىپ، م ۇلىك تۇگەندەلىپ، اقاۋلار جويىلىپ، اۋماق اباتتاندىرىلۋدا. قاتار كىرەبەرىس جولعا كۇردەلى جوندەۋ جۇرگىزىلىپ، جاڭا اسفالت توسەلۋدە.
«ءبىرىنشى كەزەكتەگى جوندەۋ جۇمىستارى ورىندالىپ، اۋماق اباتتاندىرىلىپ، نىساندار ءتيىستى جاعدايعا كەلتىرىلۋدە»، — دەدى كومپانيادا.
سونىمەن قاتار شيپاجايدا تاۋلىك بويى تۋريستىك پوليسيا بەكەتى ۇيىمداستىرىلعان، سونداي-اق بۇكىل كەشەن اۋماعىندا بەينەباقىلاۋ جۇيەسىن قۇرۋ پىسىقتالۋدا.
بۇعان دەيىن «كۋرسيۆ» شىعىس قازاقستان وبلىسىنداعى تانىمال «راحمانوۆ بۇلاقتارى» كۋرورتىنا اپاراتىن تراسسانىڭ جوندەۋىنە نارازى تۋريستەر جول جۇمىسشىلارىن بالاعاتتاپ، ولارمەن توبەلەسە باستاعانىن جازعان ەدى.