شىعىس قازاقستان وبلىسىنىڭ ريددەر قالاسىندا تۇرعىندار ايۋلاردىڭ ءىزىن ءجيى بايقاي باستادى. قالا اكىمدىگىنىڭ مالىمەتىنشە، جىرتقىشتاردى ىزدەۋ ءۇشىن جەدەل جاۋاپ بەرۋ توبى جىبەرىلگەن، دەپ حابارلايدى infohub.kz سايتى.
ريددەر تۇرعىندارى تاپقان ايۋ ىزدەرىنىڭ فوتوسۋرەتتەرىن Instagram-داعى noks_oskemen پاراقشاسى جاريالادى. "گەس ارتىنداعى باقشالار اۋدانىنداعى توپىراق جولدان ايۋدىڭ جاڭا ىزدەرى تابىلدى"، — دەلىنگەن جازبادا.
شىعىس قازاقستان وبلىسى تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ حابارلاۋىنشا، ازاماتتاردىڭ ءوتىنىشى بويىنشا 25 تامىزدان باستاپ ريددەردە ورمان جانە اڭشىلىق شارۋاشىلىعى جەدەل جاۋاپ بەرۋ توبىنىڭ ەكى ەكيپاجى جۇمىس ىستەپ جاتىر. "ەلدى مەكەندەرگە جاقىنداعان ايۋلارعا قاتىستى رەيدتىك ءىس-شارالار وتكىزىلۋدە. بۇل باعىتتا ارنايى قۇرالدار: دروندار، تەپلوۆيزورلار، ارنايى كولىكتەر قولدانىلۋدا. جۇمىس تاۋلىك بويى جۇرگىزىلۋدە. بۇل جۇمىس كۇزدىڭ سوڭىنا دەيىن جالعاسادى. تۇرعىندارمەن سويلەسەمىز، ايۋلار تۋرالى اقپارات الامىز، وسى اقپارات بويىنشا سول اۋداندى وڭدەيمىز"، — دەدى ۆەدومستۆو وكىلدەرى.
ەسكە سالا كەتەيىك، 24 تامىزدا شىعىس قازاقستان وبلىسىندا ايۋدىڭ ادامعا شابۋىل جاساعانى بەلگىلى بولعان ەدى. كۋاگەرلەردىڭ ايتۋىنشا، ومارتادا جۇمىس ىستەگەن 58 جاستاعى ەر ادام زارداپ شەككەن. كەيىن زارداپ شەككەن ادامنىڭ ءوزى بولعان وقيعانىڭ ءمان-جايىن ايتىپ بەردى.