رۋدنىيدا پوليسيا قىزمەتكەرىنىڭ ءبىر اۋىز ءسوزى كوپ ساتىلى الاياقتىق سحەماسىن كۇل-تالقان ەتتى — جەرگىلىكتى تۇرعىن ازەر قۇتىلدى، دەپ حابارلايدى infohub.kz سايتى.
قوستاناي وبلىسى پوليسيا دەپارتامەنتىنىڭ ءباسپاسوز قىزمەتى ءمالىم ەتكەندەي، تاڭەرتەڭ ايەلگە ەنەرگەتيكالىق كومپانيادان حابارلاسىپ، تەكسەرۋ جوسپارلانعانىن ايتقان. «ەلەكتروندىق كەزەك» الۋ ءۇشىن ودان حابارلاماداعى كودتى اتاۋدى سۇراعان.
«جۇمىستا بولىپ، قاتەلەسىپ كودتى اتاپ قويدىم. سودان كەيىن ماعان حقو-دان حابارلاسىپ، الاياقتاردىڭ شابۋىلىنا ۇشىراعانىمدى، ەندى ءبارىن بۇعاتتاۋ كەرەكتىگىن ايتتى»، — دەدى ايەل.
كەيىن بايلانىسقا ءوزىن كيبەرپوليسيا قىزمەتكەرىمىن دەپ تانىستىرعان ەر ادام شىقتى. ول ايەلدى eGov-تەگى قۇجاتتار مەن دەرەكتەردى بۇعاتتاۋ قاجەتتىگىنە سەندىرىپ، ۇنەمى جەلىدە ۇستاپ، ەكىنشى تەلەفوندى تابۋدى تالاپ ەتتى. اڭگىمە WhatsApp ارقىلى جالعاستى. سۇحباتتاسۋشى كامەراسىن قوسپاي، ايەلگە ءتۇرلى «قۇجاتتار» جىبەرىپ، ءوزىنىڭ شىنايىلىعىنا سەندىرۋگە تىرىستى.
قالا تۇرعىنى ەكىنشى تەلەفوننان بولىپ جاتقان جاعدايدى پوليسيا قىزمەتكەرىنە جەتكىزىپ ۇلگەردى. ول دەرەۋ وقيعا ورنىنا كەلىپ، اڭگىمەگە ءوزى قوسىلدى.
«الاياقتار ايەلدى ءىس جۇزىندە «قارماقتا» ۇستاپ، بايلانىستى ۇزبەدى. مەن ءوزىمدى پوليسيا قىزمەتكەرىمىن دەپ تانىستىرىپ، سۇحباتتاسۋشىدان كامەرانى قوسىپ، بەتىن كورسەتۋدى تالاپ ەتتىم، قوڭىراۋ شالۋشىنىڭ قىلىعى كۇرت وزگەردى. ناتيجەسىندە الاياقتارمەن ودان ءارى سويلەسۋدى توقتاتتىق»، — دەدى رۋدنىي قالالىق پوليسيا باسقارماسىنىڭ قوعامدىق قاۋىپسىزدىك ءبولىمىنىڭ باستىعى ەرلان ابدۋلمانوۆ.