مەملەكەتتىك كىرىستەر كوميتەتى كەيبىر قازاقستاندىقتارعا تابىستاردى كورسەتۋ كەزىندە انىقتالعان سايكەسسىزدىكتەر تۋرالى حابارلاما جىبەردى، دەپ حابارلايدى infohub.kz سايتى.
كوميتەتتىڭ مالىمەتىنشە، كامەرالدىق باقىلاۋ ناتيجەسىندە جالپى بەلگىلەنگەن سالىق سالۋ تارتىبىندە جۇمىس ىستەيتىن جەكە كاسىپكەرلەردىڭ تابىستارىن تولىق كورسەتۋدە سايكەسسىزدىكتەر انىقتالعان. سونداي-اق شارۋا نەمەسە فەرمەر قوجالىقتارى ءۇشىن ارنايى سالىق رەجيمىن قولداناتىن سالىق تولەۋشىلەر دە قاتەلىكتەر جىبەرگەن. بۇل 2025 جىلعى كەزەڭگە قاتىستى.
«سايكەسسىزدىكتەر سالىق نىساندارىنىڭ، ەلەكتروندىق شوت-فاكتۋرالاردىڭ (ەشف)، ەكىنشى دەڭگەيلى بانكتەردىڭ اقپاراتىنىڭ (POS-تەرمينالدار مەن ءموبيلدى تولەمدەر) جانە وزگە دە اقپارات كوزدەرىنىڭ دەرەكتەرىن زەردەلەۋ مەن تالداۋ نەگىزىندە انىقتالدى. كامەرالدىق باقىلاۋ ناتيجەلەرى بويىنشا سالىق تولەۋشىلەرگە ءتيىستى حابارلامالار جىبەرىلدى»، — دەلىنگەن رەسمي مالىمدەمەدە.
كوميتەتتە سالىق تولەۋشىلەردىڭ سايكەسسىزدىكتەردى ءوز بەتىنشە جويۋ مۇمكىندىگى بار ەكەنىن اتاپ ءوتتى. حابارلامانى العاننان كەيىن ونى ورىنداۋعا 30 جۇمىس كۇنى جانە شامامەن 45 كۇنتىزبەلىك كۇن بەرىلەدى.
«ەگەر ءسىز سايكەسسىزدىكپەن كەلىسسەڭىز — قوسىمشا سالىق ەسەپتىلىگىن تاپسىرىپ، ءوزىڭىز ەسەپتەگەن سالىق سومالارىن تولەڭىز. ەگەر بۇزۋشىلىق جوق دەپ ەسەپتەسەڭىز — نەگىزدەمەمەن تۇسىنىكتەمە بەرىڭىز. بۇل حابارلامانى ورىنداۋدىڭ بالامالى ءتاسىلى»، — دەپ قوستى سالىق قىزمەتى.
حابارلامانىڭ بار-جوعىن سالىق تولەۋشىنىڭ جەكە كابينەتىندە تەكسەرىپ، ونى ورىنداۋعا بولادى.