سەمەيدە پروباسيا قىزمەتىنىڭ ەسەبىندە تۇرعان ازامات ءۇشىن دوستارىمەن كەزدەسۋ باس بوستاندىعىنان ايىرۋعا اكەلدى، دەپ حابارلايدى infohub.kz سايتى.
اباي وبلىسى بويىنشا قاجد ءباسپاسوز قىزمەتىنىڭ مالىمەتىنشە، ءوڭىردىڭ 34 جاستاعى تۇرعىنى ءتۇستى مەتالل بۇيىمدارىن ۇرلاعانى ءۇشىن سوتتالعان. سوت وعان ءۇش جىل التى اي مەرزىمگە باس بوستاندىعىن شەكتەۋ جازاسىن تاعايىنداعان.
ۇكىم شىققاننان كەيىن ەر ادام سەمەيدەگى پروباسيا قىزمەتىنىڭ ەسەبىنە قويىلعان. قىزمەتكەرلەر وعان جازانى وتەۋ ەرەجەلەرىن، مىندەتتەرىن ءتۇسىندىرىپ، بۇزعانى ءۇشىن جاۋاپكەرشىلىك تۋرالى ەسكەرتكەن.
وسىعان قاراماستان، سوتتالعان ادام بەلگىلەنگەن تالاپتاردى بىرنەشە رەت بۇزعان. تەكسەرۋلەر كەزىندە ول ۇيدە بولماعان، ال ەلەكتروندى باقىلاۋ قۇرالىن ادەيى زاريادتاماعان.
جۇيەلى تۇردە بۇزعانى ءۇشىن پروباسيا قىزمەتى سوتقا جۇگىنگەن. ناتيجەسىندە سوت وعان باس بوستاندىعىن شەكتەۋ جازاسىن باس بوستاندىعىنان ايىرۋمەن الماستىرعان. وتەلمەگەن مەرزىمى ەكى جىل ءبىر ايدى قۇراعان.
سوتتالعان ادام وكىنىشىن ءبىلدىردى: «ماعان بوستاندىقتا قالىپ، تۇزەلۋگە مۇمكىندىك بەرىلدى. مەن جۇمىس ىستەپ، ادال جولمەن تابىس تاۋىپ، جاڭا ءومىر باستاي الار ەدىم. دەنساۋلىعىم جۇمىس ىستەۋگە مۇمكىندىك بەرەدى، ءبىراق مەن باسقا جولدى تاڭدادىم. اراققا اقشا تابۋ ءۇشىن ۇرلىق جاسادىم. پروباسيا قىزمەتىنىڭ باقىلاۋىندا جۇرسەم دە، دوستارىممەن كەزدەسىپ، ءىشۋدى جالعاستىردىم. سالدارى تۋرالى ويلامادىم، ءبارى وڭالادى دەپ سەندىم. ەندى قاتەلەسكەنىمدى ءتۇسىندىم. ىس-ارەكەتتەرىمنىڭ سالدارىنان بوستاندىقتا بولۋ مۇمكىندىگىنەن ايىرىلدىم. مەنىڭ وتباسىم، ايەلىم، بالالارىم جوق، اتا-اناممەن كوپتەن بەرى ارالاسپايمىن. ءقازىر تۇسىنەمىن: اراق پەن سول ورتا مەنىڭ ءومىرىمدى عانا بۇزدى. دوستارىم مەنى قولدايدى دەپ ويلادىم، ءبىراق ەندى ولارعا مەنىڭ ءومىرىم ءبارىبىر ەكەنىن ءتۇسىندىم. ناعىز دوستار ماعان توقتاۋعا كومەكتەسىپ، پروبلەمالار مەن جامان ارەكەتتەردەن قورعاۋى كەرەك ەدى، ءبىراق ولار جاعدايدى ودان سايىن ۋشىقتىردى. ۋاقىتىندا توقتاي الماعانىما ءوزىم كىنالىمىن. ىستەگەنىمە وتە وكىنەمىن، ۋاقىتتى كەرى قايتارعىم كەلەدى».