26-28 تامىز ارالىعىندا اقتوبە وبلىسىندا «بورىشكەر» جەدەل-پروفيلاكتيكالىق ءىس-شاراسى ءوتىپ جاتىر. ونىڭ بارىسىندا پوليسيا قىزمەتكەرلەرى 10 جانە ودان دا كوپ اكىمشىلىك ايىپپۇل جيناعان ازاماتتاردى انىقتاۋدا، دەپ حابارلايدى infohub.kz سايتى.
وبلىستىق پوليسيا دەپارتامەنتى ءباسپاسوز قىزمەتىنىڭ مالىمەتىنشە، رەيدتىڭ العاشقى كۇنىندە 19 كولىك ارنايى ايىپپۇل تۇراعىنا جىبەرىلدى. ونىڭ 9-ى شەتەلدىك تىركەۋدە بولعان. ۆەدومستۆو وكىلدەرى يرونيامەن اتاپ ءوتتى: «كەيبىرەۋلەر كوللەكسيا جيناۋدى ۇيعارعان سياقتى. الايدا جەتىستىك ءۇشىن العىس حاتتىڭ ورنىنا پوليسيا قىزمەتكەرلەرىمەن كەزدەسۋگە تۋرا كەلدى».
كولىكتەردىڭ گەوگرافياسى ءارتۇرلى بولۋى مۇمكىن، ءبىراق ەرەجە بىردەي: ەگەر بۇزساڭ — نومىرىنە جانە تىركەلگەن ەلىنە قاراماستان جاۋاپ بەرۋگە تۋرا كەلەدى. پوليسيادا اتاپ ءوتتى: «شەتەل ءنومىرلى كولىك يەلەرىنە دە بوساڭسۋعا بولمايدى. پوليسيا زاڭنامانىڭ ساقتالۋىن مۇقيات قاداعالايدى. سوندىقتان قاعيدا قاراپايىم: شەتەل ءنومىرى — ديپلوماتيالىق يممۋنيتەت ەمەس».
جۇمىس جالعاسۋدا. پوليسيا قىزمەتكەرلەرى ايىپپۇلدى ۋاقىتىندا تولەگەن دۇرىس ەكەنىن ەسكە سالدى، ايتپەسە ءبىر كۇنى كولىگىڭىزدى ايىپپۇل تۇراعىنان ىزدەۋگە تۋرا كەلۋى مۇمكىن.