شىعىس قازاقستان وبلىسىندا ادام ءومىرىن قۇتقارۋدا ەرلىك پەن باتىلدىق تانىتقان ءتارتىپ ساقشىلارىن ماراپاتتاۋ ءراسىمى ءوتتى، دەپ حابارلايدى infohub.kz سايتى.
ىشكى ىستەر مينيسترلىگىنىڭ Polisia.kz ۆەدومستۆولىق Telegram-ارناسىنىڭ مالىمەتىنشە، وبلىستىق ءماسليحاتتىڭ كەزەكتى سەسسياسىندا وبلىس اكىمى نۇرىمبەت ساكتاگانوۆ ادام ءومىرىن قۇتقارۋ كەزىندە ەرەكشەلەنگەن ەكى پوليسەيگە قۇرمەت گراموتاسىن تابىس ەتتى.
جوعارى ماراپاتقا ۇلان اۋدانى پوليسيا ءبولىمىنىڭ ۋچاسكەلىك پوليسيا ينسپەكتورى نۇرداۋلەت تەتەپوۆ پەن جەدەل-كريميناليستيكالىق توپتىڭ كريميناليسى اسەت ناعاشبايەۆ يە بولدى.
وقيعا 20 تامىزدا قاسىم قايسەنوۆ كەنتىندە بولعان. پوليسەيلەر كارىز قۇدىعىندا جۇمىس ىستەپ بارا جاتىپ ەسىن جوعالتقان ەكى جۇمىسشىعا كومەككە كەلدى. پوليسيا كاپيتانى اسەت ناعاشباەۆتىڭ قىراعىلىعى مەن پوليسيا مايورى نۇرداۋلەت تەتەپوۆتىڭ باتىل ارەكەتتەرىنىڭ ارقاسىندا ەكى ازامات ۋاقىتىلى قۇتقارىلدى.
وبلىس اكىمى پوليسيا قىزمەتكەرلەرىنىڭ ەرلىگى مەن كاسىبيلىگىن، ولاردىڭ ءارقاشان كومەككە كەلۋگە دايىن ەكەنىن اتاپ ءوتىپ، مۇنداي يگى ىستەر مەن جوعارى ازاماتتىق جاۋاپكەرشىلىكتىڭ ماڭىزدىلىعىن ايتتى.
ەسكە سالا كەتەيىك، بۇعان دەيىن شىعىس قازاقستان وبلىسىندا ۇلان اۋدانىنىڭ كريميناليسى، پوليسيا كاپيتانى اسەت ناعاشبايەۆ ويلانباستان كارىز قۇدىعىنا ءتۇسىپ، ەكى جۇمىسشىنى قۇتقارعانى حابارلانعان بولاتىن. وقيعا ورنىنا كەلگەن پوليسيا مايورى نۇرداۋلەت تەتەپوۆ دەرەۋ ارقان سۇراپ، ونى بەكىتىپ، ليۋككە تۇسكەن.