شىعىس قازاقستان وبلىسىنداعى قاسىم قايسەنوۆ اتىنداعى اۋىلدا Nomad Alemi فەستيۆالى اياسىندا سپورتتىق باعدارلاما ءوتتى. وندا 70 جاستاعى زەينەتكەر 30 كەلىلىك قوشقار ءمۇسىنىن 40 رەت كوتەردى، دەپ حابارلايدى infohub.kz سايتى.
ۇيىمداستىرۋشىلار قاتىسۋشىلارعا التى ديسيپلينا بويىنشا سىناقتان ءوتۋدى ۇسىندى. ولاردىڭ كوبى كوشپەلىلەردىڭ ءداستۇرلى مادەنيەتىنەن كەلگەن. ارقان تارتۋ، ءداستۇرلى ساداق اتۋ، لاڭگى، قوشقار ءمۇسىنىن كوتەرۋ، بەلبەۋ كۇرەسى جانە اسىق اتۋ فەستيۆال الاڭىن ۇلكەن سپورت ارەناسىنا اينالدىردى. مۇندا بالالار، جاستار مەن اعا بۋىن وكىلدەرى قاتار ءجۇردى.
قوناقتاردىڭ ەرەكشە نازارىن 30 كەلىلىك قوشقار ءمۇسىنىن كوتەرۋ (وتىرىپ-تۇرۋ) تارتتى. سىناق شىنىمەن اۋىر بولدى، الايدا قاتىسۋشىلار ءۇشىن جاس باستى كەدەرگى بولا قويمادى.
وسى الاڭنىڭ ناعىز جۇلدىزى 70 جاستاعى اپا بولدى. ول 30 كەلىلىك سناريادتى 40 رەت كوتەرىپ، تەك كورەرمەندەردى عانا ەمەس، قاتىسۋشىلاردى دا تاڭقالدىردى.
فەستيۆالدىڭ سپورتتىق شارالارىنا بارلىعى ەكى مىڭنان استام ادام قاتىستى.