شىمكەنتتە كورشىلەر اراسىنداعى جانجال 65 جاستاعى ەر ادامنىڭ ولىمىمەن اياقتالدى. مارقۇمنىڭ تۋىستارىنىڭ ايتۋىنشا، جانجالدىڭ بولجامدى سەبەبى — كونديسيونەر، دەپ حابارلايدى infohub.kz سايتى.
بۇعان دەيىن شىمكەنتتە 65 جانە 39 جاستاعى ەر ادامدار اراسىندا جانجال بولعانى حابارلانعان. وقيعا ورنىنان تۇسىرىلگەن بەينەجازبادا جاس كورشىنىڭ قارياعا بىرنەشە رەت سوققى بەرگەنى كورىنەدى. 65 جاستاعى زارداپ شەككەن ازامات ەسىن جيا المادى — كەلگەن دارىگەرلەر ونىڭ قايتىس بولعانىن راستادى. كۇدىكتى قاشىپ كەتكەن، الايدا كەيىن ۇستالدى. كەيىنىرەك پوليسيا تراگەديا جونىندە مالىمدەمە جاسادى.
بۇگىن مارقۇمنىڭ تۋىستارى جۋرناليستەرگە بولعان وقيعانىڭ بولجامدى ءمان-جايىن ايتتى. ولاردىڭ سوزىنشە، ءبارى مارقۇمنىڭ التى جاسار نەمەرەسىنىڭ كوزىنشە بولعان: بالا اتاسىن قورعاۋعا تىرىسىپ، قورقىنىشتان ايقايلاعان.
«ول: "اتامدى ۇرماڭدار!" دەپ ايقايلادى، ول كورشىنى تانيدى عوي. ءبىراق ول ءبارىبىر ۇرا بەردى. جاي عانا قۇلاتىپ، كەتىپ قالسا دا بولار ەدى، ءبىراق ول قوزعالىسسىز جاتقاندا قايتا كەلىپ، تاعى دا ۇردى. سودان كەيىن ولاردىڭ اۋلاسىنا كىرىپ، كونديسيونەردى الىپ، كەتىپ قالدى. قانداي قاتىگەزدىك! ول 38 جاستا، ال مارقۇم 65 جاستا ەدى»، — دەدى مارقۇمنىڭ تۋىسى مومىنجان يماموۆ.
تاعى ءبىر تۋىسى مۇحاممەد يماموۆ «جانجال كونديسيونەرگە بايلانىستى بولدى، ولاردىڭ بولىسەتىن باسقا ەشتەڭەسى جوق ەدى» دەپ مالىمدەدى. جەرگىلىكتى تۇرعىنداردىڭ ايتۋىنشا، كۇدىكتىنىڭ وتباسى وسىندا 20 جىلداي تۇرادى، ونىڭ اناسى پەداگوگ بولىپ جۇمىس ىستەيدى. تۋىستارى تراگەديانىڭ الدىندا ەر ادامنىڭ مارقۇم قاريانىڭ ۇلىمەن جانجالداسقانىن، ول كەزدە ونىڭ ەلدە بولماعانىن ايتادى.
ءقازىر قىلمىستىڭ ءمان-جايىن قۇقىق قورعاۋ ورگاندارى انىقتاپ جاتىر. پوليسيا ابايسىزدا ادام ولىمىنە اكەپ سوققان اۋىر دەنە جاراقاتىن قاساقانا كەلتىرۋ فاكتىسى بويىنشا سوتقا دەيىنگى تەرگەۋ باستادى.