شىمكەنتتە قالا مەكتەپتەرىنىڭ جۇمىسىن سيفرلىق تالداۋ بارىسىندا ساتىپ الۋلارعا، مۇعالىمدەردىڭ وقۋ جۇكتەمەسىنە جانە كەيبىر وتباسىلاردىڭ مارتەبەسىنە قاتىستى كۇماندى دەرەكتەر انىقتالدى، دەپ حابارلايدى infohub.kz سايتى.
قالا مەكتەپتەرىنىڭ قىزمەتىندەگى قىزىقتى مالىمەتتەردى «جەتىنشى ارنا» جاريالادى. انىقتالعان بۇزۋشىلىقتاردىڭ ءبىر بولىگى مۇعالىمدەرگە قاتىستى: مىسالى، 70 ساعاتتىق جۇكتەمەمەن جۇمىس ىستەگەن ءمۇعالىم، سونداي-اق ءبىر قىزمەتكەردىڭ ءبىر مەزگىلدە ەكى باسشىلىق لاۋازىمدى اتقارعان جاعدايلارى تىركەلدى.
سيفرلىق تالداۋ كورسەتكەندەي، ءبىر مەكتەپ بيۋدجەت قاراجاتى ەسەبىنەن 70 بالتا ساتىپ العان. سونشا قۇرال قانداي قاجەتتىلىككە جۇمسالعانى بەلگىسىز. سونىمەن قاتار ءۇش بۋحگالتەرگە 55 كالكۋلياتور تاپسىرىلعان.
سونداي-اق الەۋمەتتىك كومەك الاتىن كەيبىر وتباسىلاردىڭ وزدەرىنىڭ دۇكەندەرى، جەر تەلىمدەرى جانە بىرنەشە كولىگى بار ەكەنى انىقتالدى. ال ءوزىن از قامتىلعان وتباسى رەتىندە كورسەتكەندەردىڭ ءبىر بولىگى كومەك الۋعا قۇقىعىن راستايتىن قۇجاتتاردى ۇسىنا المادى.
جالپى العاندا، تالداۋ ءبىلىم سالاسىندا بىردەن 12 باعىت بويىنشا ەرەجەلەردىڭ ساقتالماعانىن كورسەتتى.
«سيفرلاندىرۋ كوپ كومەكتەستى. ايتقانىمداي، بىلتىر 10 ملرد 200 ملن تەڭگە ۇنەمدەدىك، بۇگىندە شامامەن 15 ملرد تەڭگە ۇنەمدەدىك. جىل سوڭىنا دەيىن ۇنەمدەلگەن قاراجات كولەمى ودان دا ارتادى دەپ ويلايمىن»، — دەدى شىمكەنت اكىمىنىڭ ورىنباسارى سارسەن قۇرانبەك.