شىمكەنتتە اكىمشىلىك ىستەر جونىندەگى سوت القاسى تۇرعىن ءۇي بەرۋ تۋرالى ءىستى قاراپ، تاراپتار سوت مەدياسياسى تارتىبىمەن تاتۋلاستى. ايەل «جەتىم بالالار جانە اتا-اناسىنىڭ قامقورلىعىنسىز قالعان بالالار» ساناتى بويىنشا كەزەككە قايتا قويىلادى، دەپ حابارلايدى infohub.kz سايتى.
تالاپ قويۋشى 2016 جىلدان بەرى وسى سانات بويىنشا تۇرعىن ۇيگە مۇقتاج رەتىندە كەزەكتە تۇرعان. اكسيونەرلىك قوعام جۇرگىزگەن تۇگەندەۋ بارىسىندا تالاپ قويۋشىنىڭ جۇبايىنىڭ بۇرىن جەكەشەلەندىرىلگەن پاتەردە ۇلەسى بولعانى انىقتالدى. وسىعان بايلانىستى تۇرعىن ءۇي بەرۋ ءراسىمى توقتاتىلعان.
ءبىرىنشى ساتىداعى سوت ءىستىڭ ءمان-جايىن جانە ۇسىنىلعان قۇجاتتاردى جان-جاقتى زەرتتەدى. كەيىننەن تالاپ قويۋشىنىڭ جۇبايىنا تيەسىلى تۇرعىن ۇيدەگى ۇلەس تولىعىمەن يەلىكتەن شىعارىلعانى بەلگىلى بولدى. سوت اكسيونەرلىك قوعامنىڭ ارەكەتتەرىن زاڭسىز دەپ تانىدى. زاڭناماعا سايكەس جەتىم بالالار تۇرعىن ۇيگە مۇقتاجدار تىزىمىنەن شىعارىلمايدى، ال تۇرعىن ءۇي بەرۋ ءراسىمىن «توقتاتا تۇرۋ» ءتارتىبى زاڭدا كوزدەلمەگەن. سوت شەشىمىمەن تالاپ قويۋ تولىق كولەمدە قاناعاتتاندىرىلدى.
اپەللياسيالىق شاعىمدى قاراۋ بارىسىندا سوت القاسى تاراپتاردى تاتۋلاستىرۋ جۇمىستارىن جۇرگىزدى. ناتيجەسىندە تاراپتار اراسىندا سوت مەدياسياسى تارتىبىمەن كەلىسىم جاسالدى. ونىڭ شارتتارى بويىنشا اكسيونەرلىك قوعام 10 جۇمىس كۇنى ىشىندە تۇرعىن ءۇي بەرۋ ءراسىمىن توقتاتۋ تۋرالى شەشىمدى جويۋعا جانە تالاپ قويۋشىنىڭ بۇرىنعى شارتتارمەن تۇرعىن ءۇي باعدارلاماسىنا ودان ءارى قاتىسۋ قۇقىعىن قالپىنا كەلتىرۋگە مىندەتتەندى.
وسىلايشا، ازاماتتىڭ بۇزىلعان قۇقىعى داۋدى بەيبىت جولمەن رەتتەۋ ارقىلى قالپىنا كەلتىرىلدى. سوت اكتىسى زاڭدى كۇشىنە ەندى.