شىمكەنتتە كامەلەتكە تولماعان بالا اياعىنان پىشاق جاراقاتىن العان وقيعا بويىنشا قىلمىستىق ءىس قوزعالدى. بۇل وقيعا دەندروساياباقتا بولعان، دەپ حابارلايدى infohub.kz.
kritika_shymkent Instagram-پاراقشاسىنىڭ مالىمەتىنشە، 17 تامىزدا شىمكەنتتەگى دەندروساياباقتا جاسوسپىرىمدەردىڭ قاتىسۋىمەن توبەلەس بولعان. جاريالانىمدا: «كاسسانىڭ ءدال قاسىندا فۋدتراك قىزمەتكەرلەرى ءبىر-بىرىنىڭ اياعىن پىشاقتاپ جارالادى. بۇل نە دەگەن زاڭسىزدىق، اتا-انالار مەن باسشىلىق قايدا قاراپ وتىر؟ بالالار كامەلەتكە تولماعان، ەرەسەكتەرسىز، پىشاقپەن»، — دەلىنگەن.
شىمكەنت قالالىق پوليسيا دەپارتامەنتىنىڭ ءباسپاسوز قىزمەتى دەنە جاراقاتىنىڭ سالدارىن راستاپ، وسى فاكتى بويىنشا قىلمىستىق ءىس قوزعالعانىن حابارلادى. زارداپ شەككەن جالعىز بولعانى انىقتالدى.
«وقيعاعا قاتىسۋشىلار انىقتالدى. جاراقات العان ءجاسوسپىرىم اۋرۋحاناعا جەتكىزىلدى. قازىرگى ۋاقىتتا وقيعانىڭ بارلىق ءمان-جايى، ونىڭ ىشىندە جانجالدىڭ سەبەپتەرى انىقتالۋدا. كامەلەتكە تولماعانداردىڭ زاڭدى وكىلدەرىنە قاتىستى بالالاردى تاربيەلەۋ جانە قاۋىپسىزدىگىن قامتاماسىز ەتۋ بويىنشا مىندەتتەرىن تيىسىنشە ورىنداماعانى ءۇشىن جاۋاپكەرشىلىككە تارتۋ ماسەلەسى قاراستىرىلۋدا»، — دەپ ناقتىلادى پوليسيادا.
شىمكەنت قالالىق پوليسيا دەپارتامەنتىندە تەكسەرۋ ناتيجەلەرى بويىنشا بارلىق قاتىسۋشى تۇلعالاردىڭ ارەكەتتەرىنە ءتيىستى قۇقىقتىق باعا بەرىلىپ، زاڭنامادا كوزدەلگەن شارالار قابىلداناتىنىن جەتكىزدى.