سولتۇستىك قازاقستان وبلىسىنىڭ تۇرعىندارى ءۇشىن تابيعات اياسىنداعى دەمالىس قايعىلى جاعدايعا اينالا جازدادى: ەسىل وزەنىندە بالىق اۋلاپ جۇرگەن جۇبايلار وق استىندا قالدى. بۇل تۋرالى Skolife_ Instagram پاراقشاسىندا جاريالانعان حابارلامادان بەلگىلى بولدى، دەپ جازادى infohub.kz سايتى.
حابارلاما اۆتورلارىنىڭ ايتۋىنشا، وقيعا قىزىلجار اۋدانىنداعى يۆانوۆكا اۋىلىنىڭ ماڭىندا بولعان. ءبىر ساتتە جاقىن جەردە اتىس باستالدى. العاشىندا دىبىس الىستان ەستىلگەن، الايدا كوپ ۇزاماي وقتار ادامداردىڭ ءدال باسىنان ۇشا باستادى.
جاريالانىم اۆتورى بىرنەشە وق ودان شامامەن 50 سانتيمەتر جەردەن وتكەنىن ايتتى. ول وقتاردىڭ بۇتالاردى تەسىپ ءوتىپ بارا جاتقانىن كورىپ، دەرەۋ جەرگە قۇلاپ، كۇيەۋىنە: «اتىپ جاتىر!» — دەپ ايقايلادى. ەر ادامنىڭ باسىنان دا وقتار ۇشقان.
ابىروي بولعاندا، اتىس كەزىندە ەشكىم زارداپ شەكپەدى. جاريالانىم اۆتورلارى: ەگەر بۇل اۋداندا اسكەري جاتتىعۋلار وتكىزىلىپ جاتسا، نەگە ادامداردى الدىن الا ەسكەرتپەدى، نەگە ەسكەرتۋ بەلگىلەرى مەن قورشاۋ قويىلمادى؟ — دەپ سۇراق قويادى.
NUR.KZ ءتىلشىسى سولتۇستىك قازاقستان وبلىسى پوليسيا دەپارتامەنتىنىڭ ءباسپاسوز قىزمەتىنە ساۋال جولدادى. وندا بالىق اۋلاعان جەردىڭ ماڭىنان اتىس دىبىستارى تۋرالى جاريالانىمعا قاتىستى تەكسەرۋ جۇرگىزىلگەنى حابارلاندى.
«جاقىن ماڭداعى اسكەري نىساندا جوسپارلى اتىس جۇرگىزىلگەنى، بۇل تۋرالى ءتيىستى بەلگىلەر ارقىلى ەسكەرتىلگەنى انىقتالدى. زارداپ شەككەندەر جوق. پوليسيا ەسكەرتۋ بەلگىلەرىنىڭ تالاپتارىن ساقتاۋعا جانە بەلگىلەنگەن قاۋىپسىزدىك شارالارىن ۇستانۋعا، اتىس جۇرگىزىلىپ جاتقان اۋماقتارعا جاقىنداماۋعا، ءوزىڭىز بەن اينالاڭىزداعىلاردى قاۋىپكە تىكپەۋگە شاقىرادى»، — دەلىنگەن ساۋالعا بەرىلگەن جاۋاپتا.