سولتۇستىك قازاقستان وبلىسىندا پوليسيا قىزمەتكەرلەرى ءىسساپاردان قايتىپ كەلە جاتىپ، استانا – پەتروپاۆلوۆسك تاس جولىندا ءقاۋىپتى مانەۆرلەردىڭ كۋاسى بولدى، دەپ حابارلايدى infohub.kz.
سولتۇستىك قازاقستان وبلىسى پوليسيا دەپارتامەنتىندەگىلەردىڭ ايتۋىنشا، جول جابىنى جوندەلىپ جاتقان ۋچاسكەدە قوزعالىس ەكى باعىتتا كەزەكپەن ءبىر جولاقپەن ۇيىمداستىرىلعان. وسىعان بايلانىستى مۇندا كولىك اعىنىنىڭ تىعىزدىعى ەرەكشە جوعارى.
الايدا 35 جاستاعى «ۆاز-2107» جۇرگىزۋشىسى بىرنەشە رەت باسىپ وزۋعا تىرىسىپ، قارسى كەلە جاتقان كولىكتەردى كەنەتتەن باعىتىن جانە جىلدامدىعىن وزگەرتۋگە ءماجبۇر ەتكەن.
بۇل بۇزۋشىلىقتى وبلىستىڭ شالعاي اۋدانىنان ءىسساپاردان قايتىپ كەلە جاتقان پوليسيا دەپارتامەنتى اپپاراتىنىڭ قىزمەتكەرلەرى تىركەدى. بۇل تۋرالى سقو پد تەرگەۋ باسقارماسىنىڭ پودپولكوۆنيگى راۋشان باكەەۆا ايتتى. ونىڭ ايتۋىنشا، اقپارات پەن بەينەجازبا دەرەۋ وسى ۋچاسكەگە قىزمەت كورسەتەتىن پاترۋلدىك پوليسيا باتالونىنىڭ ەكيپاجىنا بەرىلگەن.
ءتارتىپ ساقشىلارى جۇرگىزۋشىنى اكىمشىلىك جاۋاپكەرشىلىككە تارتتى. اۆاريالىق جاعداي تۋعىزۋ 10 اەك (43 250 تەڭگە) مولشەرىندە ايىپپۇل سالۋعا اكەپ سوعادى. جىل ىشىندە قايتالانعان جاعدايدا جازا رەتىندە 6 ايعا كولىك جۇرگىزۋ قۇقىعىنان ايىرۋ قاراستىرىلعان.
پوليسەيمەن اڭگىمەلەسۋ كەزىندە جۇرگىزۋشى جولداعى ءوز ارەكەتىن بىلاي ءتۇسىندىردى.
«جۇمىستان كەيىن جاي عانا شارشاعان ەدىم»، — دەدى ەر ادام.