پەتروپاۆلدا تەحنيكالىق قىزمەت كورسەتۋ ستانسيالارىنىڭ بىرىنە قاتىستى الاياقتىقتىڭ 37 ەپيزودىنا كۇدىكتى ۇستالدى، دەپ حابارلايدى infohub.kz.
Polisia.kzء-تىڭ مالىمەتىنشە، تەرگەۋ دەرەكتەرى بويىنشا، وتكەن جىلدىڭ تامىز ايىنان باستاپ ازاماتتار ستو-عا جۇگىنىپ، اۆتوبولشەكتەر مەن اۆتوكولىك جوندەۋ قىزمەتتەرىنە اقشا تولەگەن، الايدا ءبىرقاتار تۇتىنۋشىلارعا قاتىستى مىندەتتەمەلەر ورىندالماعان نەمەسە تولىق ورىندالماعان. كەلتىرىلگەن شىعىن كولەمى كوبىنەسە جۇزدەگەن مىڭ تەڭگەنى قۇراعان، ال ءبىر ەپيزود بويىنشا 1،5 ملن تەڭگەدەن اسقان.
اۆتوكولىك يەلەرى جوندەۋ ماسەلەلەرىن تىكەلەي شەشۋگە ۇمىتتەنىپ، قۇقىق قورعاۋ ورگاندارىنا بىردەن جۇگىنبەگەن. سقو پد كريمينالدىق پوليسيا باسقارماسىنىڭ جەدەل ۋاكىلدەرى تۇسكەن وتىنىشتەردى سالىستىرىپ، الاياقتىقتىڭ سەريالىق سيپاتىن انىقتاپ، كۇدىكتىنىڭ ىزىنە تۇسكەن.
ۆەدومستۆو: «ستانسيا جۇمىسىن ناقتى ۇيىمداستىرۋشى 26 جاستاعى قالا تۇرعىنى بولعانى انىقتالدى، دەگەنمەن ونىڭ ديرەكتورى رەسمي تۇردە باسقا ادام بولعان»، — دەپ مالىمدەدى.
قازىرگى ۋاقىتتا كۇدىكتى تەرگەۋ يزولياتورىنا قامالعان. قىلمىستىق ىستە الاياقتىقتىڭ 37 ەپيزودى تىركەلگەن. پوليسەيلەر جابىرلەنۋشىلەردىڭ شەڭبەرىن جانە وقيعانىڭ بارلىق ءمان-جايىن انىقتاپ جاتىر. تەرگەۋ جالعاسۋدا.