سولتۇستىك قازاقستان وبلىسىندا جۇكتى ايەلدىڭ ءولىمى تەرگەلۋدە. ول شۇعىل گوسپيتاليزاسيادان كەيىن كوز جۇمدى. تۋىستارىنىڭ ايتۋىنشا، قايعىلى وقيعا جولدىڭ ناشارلىعىنان بولعان – جەدەل جاردەم كولىگى بۇزىلعان جولمەن ءبىر جارىم ساعاتتان استام جۇرگەن. وسىدان كەيىن بيلىك اتالعان جول ۋچاسكەسىن جوندەۋگە ۋادە بەردى، دەپ حابارلايدى infohub.kz.
قايعىلى وقيعا سولتۇستىك قازاقستان وبلىسىنىڭ جامبىل اۋدانىندا بولدى. تۋىستارىنىڭ ايتۋىنشا، 3 شىلدە كۇنى كەشكە 34 جاستاعى داريما ساگدەەۆانىڭ (ول جۇكتىلىكتىڭ سوڭعى ايلارىندا بولعان) جاعدايى كەنەتتەن ناشارلاعان. ايەل ەسىن جوعالتقان، سودان كەيىن دارىگەرلەر شاقىرىلعان.
مارقۇمنىڭ كۇيەۋى ازامات ساگدەەۆتىڭ سەنىمى بويىنشا، ايەلىن اۋرۋحاناعا تەزىرەك جەتكىزسە، قايعىلى جاعدايدى بولدىرماۋعا بولار ەدى. «تۇنگى ساعات 12-دە جەدەل جاردەممەن ونى اۋداندىق اۋرۋحاناعا – پرەسنوۆكاعا اپاردى. مەن ءوز كولىگىممەن جەدەل جاردەمدى ەرتىپ ءجۇردىم. جۇرگىزۋشى باياۋ ءجۇردى. بىرنەشە رەت توقتادىق. مەن نەگە سونشا باياۋ كەلە جاتقاندارىڭدى سۇرادىم. ول ايەلىمنىڭ ءاربىر شۇڭقىردا اۋىرسىنۋدان ايقايلاعانىن ايتتى. ايىمجان اۋىلىنىڭ ماڭىندا ەكىنشى جەدەل جاردەم – رەانيموبيل كۇتىپ تۇردى. ءارى قاراي ايەلىمدى سونىمەن اپاردى. بۇزىلعان جولمەن 37 شاقىرىمدى ءبىر جارىم ساعات جۇردىك. اۋرۋحاناعا جەتكىزدىك. ءبىراق تاڭعى ساعات تورتتە ايەلىمدى قۇتقارا الماعاندارىن ايتتى»، – دەدى ول.
ونىڭ ايتۋىنشا، دارىگەرلەر تاسىمالداۋ كەزىندە ايەلدىڭ جۇرەگى ەكى رەت توقتاعانىن حابارلاعان. ءولىمنىڭ سەبەبى – جاتىردىڭ جارىلۋى جانە ىشكى قان كەتۋ. بالانى دا قۇتقارۋ مۇمكىن بولمادى.
مارقۇمنىڭ اكەسى مارات راحمەتوۆتىڭ ايتۋىنشا، داريما ونىڭ جالعىز قالعان بالاسى بولعان. «بۇل – مەنىڭ جالعىز قىزىم. ۇلىم بولعان – ول قايتىس بولدى. سوسىن ايەلىم ءولدى. ەندى قىزىمنان دا ايىرىلدىم. داريما كۇيەۋىمەن قالادا تۇراتىن. مەن جالعىز قالعان سوڭ، ولار اۋىلعا كوشىپ كەلدى. ءۇش جىل بويى ولارمەن بىرگە تۇردىم. قىزىم مۇندا ءمۇعالىم، وقۋ ءىسىنىڭ مەڭگەرۋشىسى بولىپ جۇمىس ىستەدى. بارلىعى ونى قۇرمەتتەيتىن. ەندى ەكى نەمەرەم قالدى. ولارعا ءالى بولعان وقيعانى ايتقان جوقپىز. انالارى ءىسساپاردا دەپ ايتتىق»، – دەدى مارقۇمنىڭ اكەسى.
قايعىلى وقيعادان كەيىن سولتۇستىك قازاقستان وبلىسى پوليسيا دەپارتامەنتى ادام ءولىمى فاكتىسى بويىنشا قىلمىستىق ءىس قوزعادى. ءقازىر سوتقا دەيىنگى تەرگەۋ ءجۇرىپ جاتىر، ونىڭ قورىتىندىسى بويىنشا پروسەسسۋالدىق شەشىم قابىلدانادى.
داريما ساگدەەۆانىڭ تۋىستارى وبەكتيۆتى تەرگەۋدى تالاپ ەتىپ، تەك دارىگەرلەردىڭ عانا ەمەس، ناۋقاستى تاسىمالداعان جولدىڭ دا جاعدايىنا باعا بەرۋ كەرەك دەپ ەسەپتەيدى.
جوعارى رەزونانستى وقيعادان كەيىن ءوڭىر بيلىگى پرەسنوۆكا – كايرانكول اۆتوموبيل جولىن جوندەۋگە باسىمدىقتى قارجىلاندىرۋ بولىنەتىنىن مالىمدەدى. سولتۇستىك قازاقستان وبلىسى اكىمىنىڭ ورىنباسارى نۇرلان كەنەسوۆتىڭ حابارلاۋىنشا، جۇمىس ءۇش كەزەڭنەن تۇرادى. «ءقازىر جۇمىستى ءۇش كەزەڭمەن جۇرگىزەمىز. ءبىرىنشى كەزەڭ – كايرانكولدان ۋكراينسكوە اۋىلىنا دەيىن، ەكىنشىسى – ۋكراينسكوەدان بلاگوۆەششەنكاعا دەيىن، ودان كەيىن پرەسنوۆكاعا دەيىن. ءبىرىنشى كەزەڭ بويىنشا جوبالىق-سمەتالىق قۇجاتتاما دايىن، ساراپتاما قورىتىندىسى الىندى. جاقىن ارادا مەردىگەر انىقتالىپ، سودان كەيىن جۇمىس باستالادى»، – دەدى ول.
سونىمەن قاتار، جامبىل اۋدانىنىڭ تۇرعىندارى الەۋمەتتىك جەلىلەردە بۇزىلعان جولدىڭ سۋرەتتەرى مەن بەينەجازبالارىن جاريالاۋدى جالعاستىرۋدا. مارقۇمنىڭ تۋىستارى سوت-مەديسينالىق ساراپتامانىڭ ناتيجەسىن كۇتۋدە، ول ءبىر اي ىشىندە دايىن بولادى.