اكىمشىلىك ىستەر جونىندەگى كاسساسيالىق سوت قىزىلورداداعى جەكە كومەكشىلەردىڭ ەڭبەگىنە اقى تولەۋ ءتارتىبى تۋرالى داۋدى تۇيىندەدى: ولاردىڭ سىياقىسىنا 1،3 ەكولوگيالىق كوەففيسيەنت قولدانىلاتىن بولدى. بۇل تۋرالى infohub.kz سايتى حابارلايدى.
NUR.KZ اگەنتتىگىنىڭ «كاسساسيالىق سوتتاردىڭ وزەكتى جاڭالىقتارى» Telegram-ارناسىنا سىلتەمە جاساي وتىرىپ حابارلاۋىنشا، كاسساسيالىق ساتى تومەنگى سوتتاردىڭ شەشىمدەرىن وزگەرىسسىز قالدىردى. ولارعا سايكەس، قىزىلوردانىڭ جۇمىسپەن قامتۋ جانە الەۋمەتتىك باعدارلامالار ءبولىمى ءۇش جەكە كومەكشىنىڭ قىزمەتىنە اقى تولەۋدى قايتا ەسەپتەۋگە مىندەتتى.
2022 جىلدىڭ قاڭتارىنان باستاپ تالاپ قويۋشىلار ءجۇرىپ-تۇرۋى قيىن ءبىرىنشى توپتاعى مۇگەدەكتىگى بار ادامدارعا جەكە كومەكشى رەتىندە قىزمەت كورسەتتى. جۇمىس تاۋلىگىنە 8 ساعات، ايىنا 240-تان 248 ساعاتقا دەيىن، جىل بويى ۇزدىكسىز جۇرگىزىلدى، كومەكشىلەر اي سايىن اتقارىلعان جۇمىسى ءۇشىن سىياقى الىپ وتىردى. سونىمەن قاتار، ولاردىڭ تابىسىنان مىندەتتى زەينەتاقى جارنالارى مەن مىندەتتى الەۋمەتتىك مەديسينالىق ساقتاندىرۋ جارنالارى ۇستالىپ، اۋدارىلىپ وتىردى.
تالاپ قويۋشىلار ەكولوگيالىق جاعدايى قولايسىز ايماقتا تۇراتىندىقتارىنا بايلانىستى ءوز قىزمەتتەرىنە اقى تولەۋگە 1،3 كوەففيسيەنتىن قولدانۋدى سۇرادى. الايدا جەرگىلىكتى اتقارۋشى ورگان ولاردىڭ ءوتىنىشىن قاناعاتتاندىرۋدان باس تارتتى.
ءبىرىنشى جانە اپەللياسيالىق ساتىلارداعى سوتتار تالاپ قويۋشىلاردىڭ تالاپتارىن قاناعاتتاندىردى. جاۋاپكەر سوت اكتىلەرىن جويۋدى سۇراپ، كاسساسيالىق شاعىم بەردى. كاسساسيالىق سوت تومەنگى سوتتاردىڭ تۇجىرىمدارىمەن كەلىستى.
سوت «ارال وڭىرىندەگى ەكولوگيالىق اپاتتان زارداپ شەككەن ازاماتتاردى الەۋمەتتىك قورعاۋ تۋرالى» زاڭعا سايكەس قىزىلوردا ەكولوگيالىق داعدارىس ايماعىنا جاتاتىنىن اتاپ ءوتتى. اتالعان زاڭعا سايكەس، وسى اۋماقتا تۇراتىن حالىققا ەكولوگيالىق جاعدايى قولايسىز ايماقتا تۇرۋىنا بايلانىستى ەڭبەگىنە اقى تولەۋ كەزىندە 1،3 كوەففيسيەنتى بەلگىلەنەدى.
كاسساسيالىق سوت تالاپ قويۋشىلار مەن جەرگىلىكتى اتقارۋشى ورگان اراسىنداعى قاتىناستار ازاماتتىق-قۇقىقتىق شارت نەگىزىندە رەسمي رەسىمدەلگەنىنە قاراماستان، ءىس جۇزىندە ولاردىڭ اراسىندا ەڭبەك قاتىناستارىنىڭ بەلگىلەرى بولعانىن انىقتادى. اتاپ ايتقاندا، جەكە كومەكشىلەر تۇراقتى نەگىزدە بەلگىلەنگەن تارتىپپەن جۇمىس اتقاردى، تاۋلىگىنە 8 ساعات قىزمەت كورسەتتى، دەمالىسسىز جۇمىس ىستەدى جانە اي سايىن كورسەتىلگەن قىزمەتتەرى ءۇشىن جۇيەلى تۇردە سىياقى الىپ وتىردى. سونىمەن قاتار، ولاردىڭ باسقا جەردە جۇمىس ىستەۋ مۇمكىندىگى شەكتەلدى.
سوت قازاقستان رەسپۋبليكاسىنىڭ ەڭبەك كودەكسىنە سايكەس ەڭبەك شارتىنىڭ نەگىزگى بەلگىلەرى جۇمىستى جەكە ءوزى اتقارۋ، ەڭبەك تارتىبىنە باعىنۋ جانە ەڭبەگى ءۇشىن سىياقى الۋ بولىپ تابىلاتىنىن كورسەتتى. اتالعان بەلگىلەردىڭ بولۋى تاراپتار اراسىنداعى قاتىناستاردىڭ ناقتى سيپاتىن ايقىنداۋ كەزىندە ەسكەرىلۋگە ءتيىس.
بۇدان باسقا، جەكە كومەكشىلەر ءۇشىن مىندەتتى زەينەتاقى جارنالارى مەن مىندەتتى الەۋمەتتىك مەديسينالىق ساقتاندىرۋ جارنالارىن ەسەپتەۋ جانە اۋدارۋ ولاردىڭ ەڭبەگىنە اقى تولەنگەنىن جانە ەڭبەك قاتىناستارىنىڭ بار ەكەنىن راستايتىن ءمان-جاي رەتىندە باعالاندى.
وسىعان بايلانىستى كاسساسيالىق سوت 1،3 كوەففيسيەنتى جەكە كومەكشىلەرگە تولەنەتىن كەپىلدەندىرىلگەن سوماعا دا قولدانىلۋعا ءتيىس دەگەن قورىتىندىعا كەلدى.