بالا كەزىندە سپورتپەن اينالىسقان ايەلدەردىڭ بيزنەستە باسشىلىق قىزمەتكە جەتۋ ىقتيمالدىعى جوعارى، دەپ حابارلايدى infohub.kz.
People باسىلىمىنىڭ جازۋىنشا، e.l.f. Beauty كومپانياسى Parity پلاتفورماسىمەن بىرلەسىپ، Power of Women's Sports Summit 2026 ءسامميتى اياسىندا اۋقىمدى زەرتتەۋ جۇرگىزدى. ساراپشىلار اقش، ۇلىبريتانيا، كانادا جانە گەرمانيادان 9،5 مىڭنان استام رەسپوندەنتپەن سۇحباتتاستى. نازاردا مەكتەپ قابىرعاسىندا كەمىندە ءۇش جىل سپورتپەن اينالىسقان جانە مانسابىن جالعاستىرعان ايەلدەر بولدى.
ناتيجەلەر كورسەتكەندەي، مۇنداي قىزمەتكەرلەر سپورتقا قاتىسى جوق ارىپتەستەرىمەن سالىستىرعاندا باسشىلىق لاۋازىمداردى 50%-عا ءجيى يەلەنەدى. سونىمەن قاتار، بۇرىن سپورتشى بولعان ايەلدەر جوعارى اكىمشىلىك قىزمەتتەرگە 37%-عا ءجيى ۇمتىلادى جانە جالاقىنى كوتەرۋ تۋرالى كەلىسسوزدەردى 25%-عا بەلسەندى جۇرگىزەدى. رەسپوندەنتتەردىڭ شامامەن 90%-ى جاتتىعۋلاردا العان داعدىلار ولاردىڭ مانساپتىق وسۋىنە تىكەلەي كومەكتەسكەنىن راستادى.
ەسەپ اۆتورلارىنىڭ اتاپ وتۋىنشە، كاسىبي رەكوردتارعا جەتۋ ەمەس، جارىستار مەن كوماندالىق جۇمىسقا قاتىسۋدىڭ ءوزى شەشۋشى ءرول اتقارادى. فيزيكالىق بەلسەندىلىك قىزداردىڭ تارتىپتىلىك، كوشباسشىلىق قاسيەتتەرىن قالىپتاستىرىپ، سترەسسكە توزىمدىلىگىن ارتتىرادى. زەرتتەۋشىلەر الىنعان دەرەكتەر قوعامدى قىزدارعا ارنالعان مەكتەپ سپورتىن بەلسەندى قولداۋعا جانە دامىتۋعا شابىتتاندىرادى دەگەن ءۇمىت ءبىلدىردى.