شەتەلدە وقيتىن قازاقستاندىق ستۋدەنتتەر وقۋدان بوس ۋاقىتىندا جۇمىس ىستەپ، تابىس تابۋعا قۇقىلى. كەي جاعدايدا ولار ەلگە ورالىپ، جتس تولەمەيدى. بۇل تۋرالى قازاقستان رەسپۋبليكاسى قارجى مينيسترلىگىنىڭ مەملەكەتتىك كىرىستەر كوميتەتى مالىمدەدى، دەپ حابارلايدى infohub.kz سايتى.
ۆەدومستۆونىڭ تۇسىندىرۋىنشە، شەتەلدە وقيتىن قازاقستان ازاماتى ءبارىبىر قازاقستان رەزيدەنتى بولىپ سانالادى. الايدا وسىنداي رەزيدەنت شەتەلدە جۇمىس ىستەپ، تابىس تاۋىپ، سول جەردە سالىق تولەسە، قازاقستاندا جەكە تابىس سالىعىن تولەۋگە مىندەتتى ەمەس.
«قازاقستان رەزيدەنتى شەتەلدە جۇمىس ىستەپ، تابىس تاۋىپ، سول جەردە سالىق تولەسە، قازاقستاندا جەكە تابىس سالىعىن تولەۋگە مىندەتتى ەمەس. بۇل نورما ق ر سالىق كودەكسىنىڭ 638-بابىنىڭ 1-تارماعىندا جانە 303-بابىندا كوزدەلگەن»، — دەلىنگەن حابارلامادا.
بۇل رەتتە ەكى نەگىزگى شارت ساقتالۋى ءتيىس. ءبىرىنشىسى — قۇجاتتىق راستاۋ: شەتەلدە سالىق تولەگەنىن راستايتىن رەسمي قۇجات بولۋى كەرەك. ەكىنشىسى — مولشەرلەمە شەكتەۋى: شەتەلدە تولەنگەن سالىق سوماسى قازاقستان زاڭناماسىندا بەلگىلەنگەن جەكە تابىس سالىعىنىڭ مولشەرلەمەسىنە، ياعني 10%-عا سايكەس كەلۋى ءتيىس.
وسىلايشا، بۇل ەرەجە شەتەلدە سالىق تولەپ قويعان ازاماتتارعا قوسارلانعان سالىق سالۋدان قۇتىلۋعا مۇمكىندىك بەرەدى.