تاراز قالاسىنىڭ №2 سوتى ەسىرتكى تاراتۋشىعا ۇكىم شىعاردى. ول پسيحوتروپتىق زاتتاردى جاسىرىن ورىندار ارقىلى تاراتقانى ءۇشىن كىنالى دەپ تانىلدى. ءار «زاكلادكا» ءۇشىن ول كريپتوۆاليۋتا ءاميانىنا 2 مىڭ تەڭگە الىپ وتىرعان، دەپ حابارلايدى infohub.kz.
ءىس ماتەريالدارىنا سايكەس، 2025 جىلدىڭ جەلتوقسانىندا ەر ادام Telegram ارقىلى بەلگىسىز كۋراتورمەن بايلانىسىپ، ەسىرتكى تاراتۋعا كەلىسكەن. ول جاسىرىن ورىنداردان بۋمالاردى الىپ، تاراز قالاسىنىڭ ءار جەرىندە جاڭا جەرلەرگە ورنالاستىرىپ جۇرگەن.
2026 جىلدىڭ اقپانىندا ەر ادام الماتىدان قۇرامىندا α-PVP بار 37 زيپ-پاكەتتەن تۇراتىن بۋمانى الىپ، تارازعا جەتكىزگەن. ول بۋمالاردىڭ ءبىرىن شاڭىراق شاعىن اۋدانىنداعى جاسىرىن ورىنعا قويعاننان كەيىن پوليسيا قىزمەتكەرلەرى ونى ۇستادى. ءتىنتۋ كەزىندە ودان 11،58 گرامم پسيحوتروپتىق زات الىندى.
قىلمىستىق كودەكستىڭ 297-بابى 3-بولىگىنىڭ سانكسياسى م ۇلىكتى تاركىلەۋمەن 7 جىلدان 12 جىلعا دەيىن باس بوستاندىعىنان ايىرۋدى كوزدەيدى. پروكۋرور امنيستيا زاڭىن ەسكەرە وتىرىپ، ەر ادامعا 5 جىل 4 اي باس بوستاندىعىنان ايىرۋ جازاسىن تاعايىنداۋدى سۇرادى.
«سوت ەر ادامدى ەرەكشە ءىرى مولشەردە پسيحوتروپتىق زاتتاردى وتكىزۋ ماقساتىندا زاڭسىز ساتىپ الۋ جانە ساقتاۋ، الدىن الا كەلىسىم بويىنشا ادامدار توبىمەن جاساعانى ءۇشىن كىنالى دەپ تانىدى. وعان 7 جىل باس بوستاندىعىنان ايىرۋ جازاسى تاعايىندالدى. امنيستيا زاڭىن ەسكەرە وتىرىپ، تۇپكىلىكتى مەرزىم 4 جىل 8 ايدى قۇرادى»، — دەپ حابارلادى سوتتىڭ ءباسپاسوز قىزمەتى.
ۇكىم ازىرگە زاڭدى كۇشىنە ەنگەن جوق.
بۇعان دەيىن «كۋرسيۆ» كوكشەتاۋدا زاكلادكا تاراتۋشى وتباسىنىڭ سوتتالعانىن جازعان بولاتىن. نەبارى التى كۇن ارالىقپەن 20 جاستاعى قىز بەن ونىڭ اكەسىنە ۇكىم شىعارىلدى. قىزعا ناقتى مەرزىم تاعايىندالسا، 30 بۋما سينتەتيكالىق ەسىرتكىمەن ۇستالعان اكەسىنە جازانى وتەۋدى كەيىنگە قالدىرۋ قولدانىلدى.