تارازدا بولعان ءىرى ءورت 10 وتباسىن باسپاناسىز قالدىردى — ءتىلسىز جاۋ ەكى پاتەردى جانە باراك ءتيپتى ءۇيدىڭ شاتىرىنىڭ ءبىر بولىگىن جويدى، دەپ حابارلايدى infohub.kz سايتى.
ءورت بىرنەشە كۇن بۇرىن تۇتانعان. تۇرعىنداردىڭ ايتۋىنشا، جالىن پاتەرلەردىڭ بىرىنەن شىعىپ، كەيىن شاتىرعا تاراعان. ءورتتى سوندىرۋگە شامامەن ءبىر جارىم ساعات ۋاقىت كەتكەن، سوندىرۋگە 30 قۇتقارۋشى جۇمىلدىرىلعان.
ءورتتىڭ جالپى اۋدانى شامامەن 250 شارشى مەتردى قۇرادى. ەكى پاتەر تولىعىمەن ورتەنىپ، قالعان بولمەلەر زاقىمدانعان. ءقازىر تۇرعىندار امان قالعان زاتتارىن قۇتقارۋعا تىرىسۋدا، الايدا ءسوندىرۋ كەزىندە كەيبىر پاتەرلەردى سۋ باسقان.
«سۋ ءالى دە اعىپ جاتىر، توقتاماي تۇر. كەرمە توبە سۋعا تولى. ارتقى بولمەدە دە ءبارى سۋ استىندا. كورپەلەر مەن ماتراستاردىڭ ءبارى سۋ. مىنە، ءبارىن جايىپ كەپتىرىپ جاتىرمىز»، — دەدى ءۇي تۇرعىنى سابيرا قولداسوۆا.
باسپاناسىز 30 ادام قالدى، ولاردىڭ ىشىندە بەس بالا بار. زارداپ شەككەندەردىڭ ءبىر بولىگى تۋىستارىنىڭ ۇيىندە تۇر، كەيبىرەۋلەرى ۋاقىتشا ارنايى ورتالىقتارعا ورنالاستىرىلدى. بىرنەشە ادام ورتەنگەن ءۇيدىڭ جانىنا جاتىن ورنىن جاساپ العان.
«ءبىز شاتىردا تۇرىپ جاتىرمىز. تۋىستارى بارلار سوندا تۇرىپ جاتىر. مۇندا ءقازىر ەشكىم تاماق پىسىرمەيدى. كوممۋنيكاسيا جوق. جالپى ەشقانداي كومەك جوق»، — دەدى احمەتجان جامالبەكوۆ.
ادامدار سۋىقتىڭ جاقىنداۋىنان قورقىپ، جەرگىلىكتى بيلىكتەن باسپانامەن كومەكتەسۋدى سۇراپ وتىر. ءورت ورنىنا تاراز اكىمى باقىتجان ورىنبەكوۆ كەلگەن. ونىڭ ايتۋىنشا، تولەمدەر تۋرالى شەشىم توتەنشە جاعدايلار دەپارتامەنتىنىڭ قورىتىندىسى الىنعاننان كەيىن قابىلدانادى.
«ەكى كۇن ىشىندە تەرگەۋ ارەكەتتەرى تولىعىمەن اياقتالىپ، بىزگە ناتيجەلەرى بەرىلەدى. سولاردىڭ نەگىزىندە تولەم مولشەرىن انىقتايمىز. وسى قورىتىندى قولىمىزعا تيمەيىنشە، ەشتەڭە ىستەي المايمىز»، — دەدى تاراز اكىمى باقىتجان ورىنبەكوۆ.
ارنايى كوميسسيا ءورتتىڭ سەبەبىن انىقتاپ، تۇرعىندارعا كەلتىرىلگەن شىعىندى ەسەپتەپ جاتىر. زارداپ شەككەندەرگە بيۋدجەتتەن ءبىرجولعى تولەم بەرىلۋى مۇمكىن — ونىڭ ەڭ جوعارى مولشەرى شامامەن 1،3 ملن تەڭگەنى قۇرايدى.