تارازدا 1300 ورىنعا ارنالعان زاماناۋي سالتانات سارايىنىڭ قۇرىلىسى باستالدى. بۇل — مەملەكەت باسشىسى قاسىم-جومارت توقاەۆتىڭ وڭىرلەردەگى الەۋمەتتىك جانە مادەني ينفراقۇرىلىمدى دامىتۋ جونىندەگى تاپسىرمالارىنىڭ ارقاسىندا جۇزەگە اسىپ جاتقان جوبا، دەپ حابارلايدى infohub.kz.
بولاشاق نىساننىڭ ىرگەتاسىنا كاپسۋلا سالۋ ءراسىمى بالاۋسا شاعىن اۋدانىندا ءوتتى. جوبانىڭ قۇنى 18،5 ملرد تەڭگەنى قۇرايدى. كەشەننىڭ قۇرىلىسىنا 5 گەكتار جەر بولىنگەن، ال نەگىزگى عيماراتتىڭ اۋدانى 13 مىڭ شارشى مەتردى قۇرايدى.
جوبادا 1300 ورىندىق كورەرمەن زالى، ءباسپاسوز ورتالىعى، كونفەرەنس-زالدار جانە شىعارماشىلىق ۇيىرمەلەرگە ارنالعان بولمەلەر قاراستىرىلعان. نىسان زاماناۋي جارىقتاندىرۋ جانە دىبىس جۇيەلەرىمەن جابدىقتالادى. مۇندا كونسەرتتەر، تەاترلاندىرىلعان قويىلىمدار، شىعارماشىلىق كەشتەر، سونداي-اق رەسپۋبليكالىق جانە حالىقارالىق دەڭگەيدەگى مادەني ءىس-شارالار وتكىزۋ جوسپارلانۋدا.
جاڭا كەشەن بالالار مەن جاستاردىڭ شىعارماشىلىق قابىلەتتەرىن دامىتۋعا، شىعارماشىلىق ۇجىمداردىڭ قىزمەتىنە جانە جاڭا مادەني جوبالاردى جۇزەگە اسىرۋعا قوسىمشا مۇمكىندىكتەر بەرەدى. سالتانات سارايىن پايدالانۋعا بەرۋ 2028 جىلدىڭ ناۋرىزىنا جوسپارلانعان.
ءراسىم بارىسىندا جامبىل وبلىسىنىڭ اكىمى ەربول قاراشوكەيەۆ جاڭا نىساننىڭ تارازدىڭ مادەني دامۋى ءۇشىن ماڭىزدىلىعىن اتاپ ءوتتى. «مەملەكەت باسشىسى قاسىم-جومارت كەمەل ۇلى توقايەۆ مادەنيەت پەن ونەردى دامىتۋعا، حالىققا قولايلى جاعداي جاساۋعا جانە ەلدىڭ رۋحاني الەۋەتىن نىعايتۋعا ەرەكشە ءمان بەرەدى. تاريحى ەكى مىڭ جىلدان استام تاراز ءۇشىن مادەنيەت پەن ونەر ءارقاشان ماڭىزدى ورىن العان. سوندىقتان زاماناۋي مادەني ينفراقۇرىلىمدى قالىپتاستىرۋ — ماڭىزدى مىندەتتەردىڭ ءبىرى. سالىنىپ جاتقان سالتانات سارايى قالانىڭ مادەني ومىرىنە جاڭا سەرپىن بەرىپ قانا قويماي، ونىڭ تۋريستىك تارتىمدىلىعىن ارتتىرۋعا دا ىقپال ەتەدى. جامبىل وبلىسىنىڭ تۇرعىندارى اتىنان ەلىمىزدىڭ پرەزيدەنتى قاسىم-جومارت كەمەل ۇلى توقاەۆقا ءوڭىردىڭ الەۋمەتتىك-مادەني دامۋىنا كورسەتكەن نازارى مەن ماڭىزدى جوبالاردى قولداعانى ءۇشىن شىنايى العىسىمدى بىلدىرەمىن»، — دەدى ەربول قاراشوكەيەۆ.
سونداي-اق ءىس-شارادا جامبىل وبلىستىق ءماسليحاتىنىڭ ءتوراعاسى ابدالى نۇرالييەۆ پەن قازاقستان رەسپۋبليكاسىنىڭ ەڭبەك سىڭىرگەن قايراتكەرى اسىلحان شۇنىرەكوۆ ءسوز سويلەدى. مادەنيەت قىزمەتكەرلەرىنىڭ اتىنان سويلەگەن اسىلحان شۇنىرەكوۆ جاڭا نىسان شىعارماشىلىق ۇجىمدار مەن جاس تالانتتاردىڭ دامۋىنا قوسىمشا مۇمكىندىكتەر اشاتىنىنا سەنىم ءبىلدىردى.
جامبىل وبلىسى اكىمدىگىندە قازىرگى ۋاقىتتا تارازداعى ەڭ ۇلكەن كونسەرت زالى 951 كورەرمەنگە ارنالعانىن اتاپ ءوتتى. عيمارات 1980 جىلى سالىنىپ، 2017 جىلى قايتا جوندەۋدەن وتكەن. جاڭا سالتانات سارايى ءىرى مادەني ءىس-شارالاردى وتكىزۋگە ارنالعان زاماناۋي ءارى كەڭىرەك الاڭعا اينالادى.