تاراز قالالىق سوتى قارجى ورتالىعىنىڭ مەملەكەتتىك گرانت بويىنشا وقىعان تۇلەكتەن وقۋ شىعىنىن ءوندىرۋ تۋرالى تالابىن قاناعاتتاندىرمادى. سەبەبى جاۋاپكەردە پەداگوگتىڭ كاسىبي مىندەتتەرىن اتقارۋعا كەدەرگى كەلتىرەتىن اۋىر پسيحيكالىق اۋرۋ انىقتالعان، دەپ حابارلايدى infohub.kz سايتى.
جامبىل وبلىسى سوتتارىنىڭ رەسمي Telegram-ارناسىندا ءمالىم بولعانداي، تاراز قالالىق سوتى قارجى ورتالىعىنىڭ جاۋاپكەرگە قويعان وقۋ شىعىنىن ءوندىرۋ تۋرالى ازاماتتىق ءىسىن قارادى.
2016 جىلى جاۋاپكەر «دەنە شىنىقتىرۋ جانە سپورت» ماماندىعى بويىنشا «قازاق سپورت جانە تۋريزم اكادەمياسى» اق-عا ءبىلىم گرانتىمەن قابىلدانعان. وقۋ بارىسىندا رەسپۋبليكالىق بيۋدجەتتەن جوعارى وقۋ ورنىنىڭ شوتىنا 1،7 ملن تەڭگە اۋدارىلعان. 2020 جىلى جاۋاپكەر وقۋدى ءساتتى اياقتادى.
شارت تالاپتارى بويىنشا جاۋاپكەر ءبىلىم بەرۋ ۇيىمدارىندا كەمىندە 3 جىل جۇمىس ىستەۋى ءتيىس ەدى. تالاپ قويۋشى سوتقا جۇگىنىپ، جاۋاپكەردىڭ نەبارى 7 اي جۇمىس ىستەگەنىن كورسەتىپ، وقۋ شىعىنى رەتىندە 1،4 ملن تەڭگە جانە 1،1 ملن تەڭگە كولەمىندە ءوسىمپۇل ءوندىرۋدى سۇرادى.
سوت جاۋاپكەردە وقۋدى بىتىرگەننەن كەيىن اۋىر پسيحيكالىق اۋرۋ انىقتالعانىن بەلگىلەدى. ول بىرنەشە رەت ەمدەلىپ، پسيحياتريالىق ديسپانسەرلىك ەسەپتە تۇرعان.
سوت جاۋاپكەردىڭ پەداگوگتىڭ كاسىبي مىندەتتەرىن اتقارۋعا كەدەرگى بولاتىن اۋرۋدىڭ پايدا بولۋىنا جاۋاپتى بولا المايدى دەگەن قورىتىندىعا كەلدى.
سوت شەشىمىمەن قارجى ورتالىعىنىڭ تالابى تولىعىمەن قاناعاتتاندىرىلمادى. شەشىم زاڭدى كۇشىنە ەنگەن جوق.