جامبىل وبلىسىندا ەر ادامنىڭ قايتىس بولۋىنا بايلانىستى جاڭا ءمان-جايلار انىقتالدى. تەرگەۋ دەرەكتەرى بويىنشا، ونى ۇرلاپ، اياۋسىز سوققىعا جىققان. كۇدىكتىگە ايىپ تاعىلىپ، ونىڭ بايلانىستارى تەكسەرىلۋدە، دەپ حابارلايدى infohub.kz.
جامبىل وبلىسى پوليسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي، سوتقا دەيىنگى تەرگەۋ قازاقستان رەسپۋبليكاسى قىلمىستىق كودەكسىنىڭ ەكى بابى بويىنشا جۇرگىزىلۋدە: «ادامدى ۇرلاۋ» جانە «ابايسىزدا جابىرلەنۋشىنىڭ ولىمىنە اكەپ سوققان اۋىر دەنە جاراقاتىن قاساقانا كەلتىرۋ».
«كۇدىكتى ۋاقىتشا ۇستاۋ يزولياتورىنا قامالدى. باسقا ادامداردىڭ دا بۇل وقيعاعا قاتىسى بار-جوعى انىقتالۋدا. قازىرگى ۋاقىتتا ءىستىڭ ءمان-جايىن جان-جاقتى، تولىق جانە وبەكتيۆتى انىقتاۋعا باعىتتالعان قاجەتتى تەرگەۋ شارالارى جۇرگىزىلۋدە. تەرگەۋ بارىسى جامبىل وبلىسى پوليسيا دەپارتامەنتى باسشىلىعىنىڭ ەرەكشە باقىلاۋىندا»، — دەپ اتاپ ءوتتى ۆەدومستۆودا.
بۇعان دەيىن قايتىس بولعان ادامنىڭ اپكەسى اعاسىنىڭ اۋرۋحانادا جۇمىس ىستەگەنىن ايتقان. ونىڭ سوزىنشە، ناۋقاستاردىڭ ءبىرىنىڭ بۇرىنعى كۇيەۋى ەر ادامعا قوڭىراۋ شالىپ، بالاعاتتاپ، اقىرى كەزدەسۋگە شاقىرعان. ايەلدىڭ ايتۋىنشا، سول جەردە ءۇش جىگىت اعاسىنىڭ باسىنا سوققى بەرىپ، كولىكتىڭ باگاجىنە سالىپ كەتكەن. كەيىن جابىرلەنۋشىنى اسا وزەنىنىڭ جاعاسىنا اپارىپ، اياۋسىز سوققىعا جىققان. سودان سوڭ ونى ءوز كولىگىنە سالىپ، اۋرۋحاناعا اپارىپ، كوشەدەن تاۋىپ العاندارىن ايتقان. ەر ادام ەسىن جيماي قايتىس بولعان.
سونداي-اق اپكەسى پوليسيا الدىمەن ءۇش كۇدىكتىنى ۇستاعانىن، كەيىن ەكەۋىن بوساتقانىن حابارلاعان. جامبىل وبلىسى پوليسيا دەپارتامەنتى تەرگەۋ جالعاسىپ جاتقانىن راستادى.