تەمىرتاۋدا قالانى تاۋلىك بويى باقىلاپ، قۇقىق بۇزۋشىلىقتارعا جەدەل دەن قويۋعا مۇمكىندىك بەرەتىن قاداعالاۋ رەاگيروۆانيە ورتالىعى جۇمىسىن باستادى، دەپ حابارلايدى infohub.kz سايتى.
ورتالىقتىڭ ءبىرىڭعاي ۆيدەوكابىرعاسىنا كوشەلەردە، ساياباقتاردا، مەكتەپتەردە، بالاباقشالاردا، مەديسينالىق مەكەمەلەردە جانە باسقا دا نىسانداردا ورناتىلعان 1575 كامەرا قوسىلعان.
جۇمىستىڭ جەكە باعىتى ۋاقىتشا ۇستاۋ يزولياتورلارىنداعى ادامداردىڭ قۇقىقتارىنىڭ ساقتالۋىن باقىلاۋعا بايلانىستى. قاشىقتىقتان مونيتورينگتىڭ ارقاسىندا زاڭسىز ۇستاۋدان سەگىز ادام بوساتىلدى.
سونىمەن قاتار، ورتالىققا سيفرلىق قاداعالاۋ جۇيەسى ينتەگراسيالانعان. تاۋلىك بويى مونيتورينگتى كەزەكشى پروكۋرورلار جۇرگىزەدى، ال انىقتالعان بۇزۋشىلىقتار تۋرالى اقپارات وقيعا ورنىنا بارماي-اق وڭدەلۋى مۇمكىن.
قابىلدانىپ جاتقان شارالاردىڭ ناتيجەسىندە قالاداعى جالپى قىلمىس دەڭگەيى 28%-عا، اۋىر قىلمىستار سانى 50%-عا، ال كامەلەتكە تولماعاندار جاساعان قىلمىستار 87%-عا تومەندەدى.
ورتالىقتىڭ اشىلۋىنا باس پروكۋراتۋرانىڭ قارجى دەپارتامەنتىنىڭ باستىعى ءىلياس يسپانوۆ، قىزمەت باستىعىنىڭ ورىنباسارى اقىمجان ءاۋبىتايىن، قاراعاندى وبلىسىنىڭ پروكۋرورى مۇرات تىلەۋبەردييەۆ جانە قالالىق مەملەكەتتىك ورگانداردىڭ وكىلدەرى قاتىستى.
بۇعان دەيىن تەمىرتاۋدا وقۋ جىلىنىڭ باسىندا مەكتەپتەر مەن جاياۋ جۇرگىنشىلەر وتكەلدەرىنىڭ جانىنا وقۋشىلاردىڭ 62 كولەمدى ءمۇسىنى ورناتىلعانى حابارلانعان بولاتىن. جوبانى Qarmet قالالىق پروكۋراتۋرامەن بىرلەسىپ جۇزەگە اسىردى. مۇسىندەر وقۋ ورىندارىنىڭ جانىنا جانە وقۋشىلاردىڭ ءجۇرۋ باعىتتارىنا، ونىڭ ىشىندە وتكەلدەر مەن جول بەلگىلەرىنىڭ قاسىنا قويىلدى. قۇرىلىمداردىڭ ءبىر بولىگى قاراڭعى ۋاقىتتا جاقسى كورىنۋ ءۇشىن جارىق شاعىلىستىراتىن ەلەمەنتتەرمەن جابدىقتالعان.