«وتباسى بانكى» باسقارما ءتوراعاسىنىڭ ورىنباسارى جانسۇلتان ماتاي ورتالىق كوممۋنيكاسيالار قىزمەتىندەگى بريفينگتە مەملەكەتتەن تۇرعىن ءۇي الۋ كەزەگىندە تۇرعاندارمەن جۇرگىزىلىپ جاتقان جۇمىس تۋرالى ايتتى، دەپ حابارلايدى infohub.kz سايتى.
جانسۇلتان ماتاي 2026 جىلى «وتباسى بانكىنە» اكىمدىكتەردەگى كەزەكتە تۇرعاندارعا تۇرعىن ءۇي ءبولۋ فۋنكسياسى بەرىلگەنىن ەسكە سالدى.
«بۇگىنگى تاڭدا 10 مىڭنان استام كرەديت جانە 19 مىڭنان استام جالدامالى تۇرعىن ءۇي بەرىلدى. وسىلايشا، 29 مىڭنان استام ادام تۇرعىن ءۇي العاندىقتان، كەزەكتەن شىعارىلدى. سونداي-اق سوڭعى ءبىر جىلدا كەزەكتى تۇگەندەۋ اياسىندا 64 894 ادام كەزەكتەن شىعارىلدى. ولاردىڭ قاتارىندا مەملەكەتتىك قولداۋ شارالارىن العاندار دا بار»، — دەدى ول.
ونىڭ دەرەگىنشە، «وتباسى بانكىنە» كەزەكتە تۇرعان ادامدار تۋرالى مالىمەتتەردى ولاردىڭ كەلىسىمىنسىز وزەكتەندىرۋگە رۇقسات بەرىلگەندىكتەن، بۇل جۇمىس كۇشەيتىلەدى.
«ءبىزدىڭ پايىمداۋىمىزشا، ولاردىڭ 30–40%-ى شىنىمەن تۇرعىن ۇيگە مۇقتاج ەمەس. وتكەن جىلدىڭ قازان ايىنان باستاپ كەزەكتە تۇرعان ادامدارعا تۇرعىن ءۇي الۋ ءۇشىن بازاداعى وزدەرى تۋرالى مالىمەتتەردى جاڭارتۋ، ياعني تۇگەندەۋدەن ءوتۋ قاجەتتىگىن ايتىپ كەلەمىز. الايدا ادامداردىڭ جارتىسىنان كوبى بۇعان اسىقپايدى. بۇل نەنى كورسەتەدى؟ دەرەكتەردى وڭدەۋگە كەلىسىم بەرمەگەندەردىڭ كەزەكتە تۇرۋعا نەگىزى جوق بولۋى ابدەن مۇمكىن. بۇرىن ءبىز بۇل جۇمىستى بەلسەندى جۇرگىزە المادىق، سەبەبى دەربەس دەرەكتەردى وڭدەۋگە كەلىسىم قاجەت ەدى. ءقازىر ۇلتتىق دامۋ ينستيتۋتى رەتىندە بىزگە ادامنىڭ كەلىسىمىنسىز تۇگەندەۋ جۇرگىزۋگە رۇقسات بەرىلدى. بۇل جۇمىستى جالعاستىرامىز. وسىندايلاردى انىقتايتىن بولامىز، ولارعا قاتىستى ءتيىستى شارالار قابىلدانادى»، — دەدى ول.
ونىڭ دەرەگىنشە، اكىمدىكتەر تۇرعىن ءۇي كەزەگىندە تۇرعان 642 مىڭ ادامنىڭ ءتىزىمىن تاپسىرعان.
بۇعان دەيىن ءبىر جىلدا قازاقستاندا 30 مىڭعا جۋىق كەزەكتە تۇرعان ادامعا تۇرعىن ءۇي بولىنگەنىن حابارلاعان بولاتىنبىز. ال 14 قىركۇيەكتەن باستاپ تۇرعىن ءۇي كەزەگى جاڭا ەرەجەلەر بويىنشا جۇمىس ىستەي باستادى.