تۇركىستاندا وبلىستىق بالالار اۋرۋحاناسىنىڭ بازاسىندا بالالارعا ارنالعان وڭىرلىك مامانداندىرىلعان كارديوحيرۋرگيا ورتالىعى جۇمىسىن باستادى. مۇندا تۇركىستان جانە قىزىلوردا وبلىستارىنىڭ، سونداي-اق شىمكەنت قالاسىنىڭ جاس پاسيەنتتەرى جوعارى تەحنولوگيالىق مەديسينالىق كومەك الا الادى، دەپ حابارلايدى infohub.kz سايتى.
وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى جانبولات دىلدابەكوۆ مۇنداي ورتالىقتىڭ اشىلۋى تۋا بىتكەن جۇرەك اقاۋى بار بالالارعا مەديسينالىق كومەكتىڭ قولجەتىمدىلىگىن ارتتىرۋداعى ماڭىزدى قادام ەكەنىن اتاپ ءوتتى.
«ەندى تۇركىستان، قىزىلوردا وبلىستارى مەن شىمكەنتتەن تۋا بىتكەن جۇرەك اقاۋى بار بالالار ۇيىنە جاقىن جەردە جوعارى مامانداندىرىلعان كارديوحيرۋرگيالىق كومەك الا الادى»، — دەدى ول.
جاڭا ورتالىق قۇرامىندا كارديوحيرۋرگيا، كارديورەانيماسيا بولىمشەلەرى جانە زاماناۋي وپەراسيالىق بلوك جۇمىس ىستەيدى. مۇندا جىلىنا جۇزدەن استام كۇردەلى وپەراسيا جاساۋ جوسپارلانۋدا.
دىلدابەكوۆتىڭ ايتۋىنشا، بۇل ءوڭىردىڭ كىشكەنتاي پاسيەنتتەرىنە جوسپارلى دا، شۇعىل دا كومەك كورسەتۋگە مۇمكىندىك بەرەدى. ول سونداي-اق 2014 جىلدان بەرى تۇركىستان وبلىستىق بالالار اۋرۋحاناسىندا تۋا بىتكەن جۇرەك اقاۋى بويىنشا 3،4 مىڭنان استام وپەراسيا جاسالعانىن ەسكە سالدى. قازىرگى ۋاقىتتا بالالار كارديوحيرۋرگياسى بولىمشەسىندە اشىق جۇرەككە جاسالاتىن كۇردەلى وتالاردى قوسا العاندا، جىلىنا جۇزدەن استام وپەراسيا جاسالادى.
«جاڭا ورتالىقتىڭ جۇمىسى جۇرەك اقاۋلارىن ەرتە انىقتاۋعا، سونداي-اق بالالاردى ۋاقىتىلى ەمدەۋگە مۇمكىندىك بەرەدى»، — دەپ اتاپ ءوتتى ول.
بۇعان دەيىن 2025 جىلى قازاقستاندا اشىق جۇرەككە 13 مىڭنان استام وپەراسيا جاسالىپ، ءجۇز جۇرەك ترانسپلانتاسياسى ورىندالعانى حابارلانعان بولاتىن. دەنساۋلىق ساقتاۋ مينيسترلىگىنىڭ دەرەكتەرىنە سايكەس، ەلدە جۇرەك-قان تامىرلارى اۋرۋلارىنان بولاتىن ءولىم-جىتىم سوڭعى بەس جىلدا ۇشتەن بىرگە تومەندەگەن.