تۇركىستان وبلىسىندا پوليسەيلەر الماتى – تاشكەنت – تەرمەز تاس جولىندا جالعان ءنومىرى بار كولىكتى قۋىپ، ۇستادى، دەپ حابارلايدى infohub.kz سايتى.
Polisia.kz Telegram-ارناسىنىڭ مالىمەتىنشە، پوليسيانىڭ سيفرلىق جۇيەسى الماتى – تاشكەنت – تەرمەز تاس جولىندا جالعان مەملەكەتتىك ءنومىر بەلگىسى بار Toyota Camry كولىگىن انىقتاعان. اقپارات پاترۋلدىك ەكيپاجعا بەرىلدى.
كولىكتى توقتاتۋ ارەكەتى كەزىندە جۇرگىزۋشى پوليسيانىڭ زاڭدى تالابىن ەلەمەي، قاشۋعا تىرىسقان. پاترۋلدەر بۇزۋشىنى جەدەل ۇستادى. رولدە سارىاعاش اۋدانى جاڭا تۇرمىس اۋىلىنىڭ 26 جاستاعى تۇرعىنى وتىرعانى انىقتالدى.
بۇزۋشى بىرنەشە باپ بويىنشا اكىمشىلىك جاۋاپكەرشىلىككە تارتىلدى، ونىڭ ىشىندە جالعان مەملەكەتتىك ءنومىر بەلگىسىن پايدالانۋ، قۇجاتسىز كولىك جۇرگىزۋ جانە بيلىك وكىلىنىڭ زاڭدى تالابىنا باعىنباۋ. سوت شەشىمىمەن ول بەس تاۋلىككە قاماققا الىندى. سونىمەن قاتار، وعان 40 اەك (173 مىڭ تەڭگە) كولەمىندە ايىپپۇل سالىندى. كولىك تاركىلەنىپ، ايىپپۇل تۇراعىنا قويىلدى.