تۇركىستان وبلىسىنىڭ 66 جاستاعى تۇرعىنىنا قاتىستى قىلمىستىق ءىس سوتقا جولداندى. ول تويدا ايتقان جانجالدى تىلەگى ءۇشىن ۇستالعان ەدى، دەپ حابارلايدى infohub.kz.
تۇركىستان وبلىسى پوليسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي، ەر ادامعا قاتىستى ءىس ماتەريالدارى سوتقا جىبەرىلدى.
ەسكە سالايىق، وقيعانىڭ ۆيدەوسىن ءانشى روزا القوجا ءوزىنىڭ Instagram پاراقشاسىندا جاريالاعان. ول توي جەتىسايدا وتكەنىن، تىلەكتى قالىڭدىقتىڭ تۋىسى ايتقانىن اتاپ وتكەن.
ەر ادام سوزىندە تويدا الكوگولدەن باس تارتقاننان كەيىن تاعى ەكى قادام جاساۋ كەرەكتىگىن ايتقان. «بىرىنشىدەن، مۋزىكادان ارىلۋ كەرەك. ەكىنشىدەن، ەرلەر مەن ايەلدەر بولەك وتىرۋى ءتيىس. انشىلەر مەنى كەشىرسىن. ەگەر تويدى انشىلەرسىز وتكىزسە، ولار جۇلدىز بولۋدى قويىپ، تانىمالدىعىن جوعالتادى. شاريعاتتا ولاردى «شايتاننىڭ جارشىسى» دەپ اتايدى»، — دەگەن قوناق.
ءانشىنىڭ پىكىرىنشە، مۇنداي سوزدەر ەر ادامنىڭ دەسترۋكتيۆتى ءدىني اعىمداردىڭ بىرىنە جاقىندىعىن كورسەتۋى مۇمكىن.
توي قوناعىنىڭ سوزىنە ەرلان قارين جانە قازاقستان مۇسىلماندارى ءدىني باسقارماسىنىڭ وكىلدەرى جاۋاپ بەردى.
كەيىنىرەك تۇركىستان وبلىسىنىڭ 66 جاستاعى تۇرعىنىنا قاتىستى ءدىني جانە الەۋمەتتىك الاۋىزدىقتى قوزدىرۋ بەلگىلەرى بويىنشا قىلمىستىق ءىس قوزعالعانى بەلگىلى بولدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى.