استانا تۇرعىنى تۇركياعا ساپار شەگۋدى ارمانداپ، الاياقتىڭ قۇربانى بولىپ، 600 مىڭ تەڭگەسىنەن ايىرىلدى. وقيعا ەر ادامنىڭ ۆيزا راسىمدەۋگە كومەك سۇراپ، دەلدالعا جۇگىنگەننەن كەيىن بولعان، دەپ حابارلايدى infohub.kz.
قازاقستان استاناسىندا ينتەرنەت-الاياقتىق فاكتىسى بويىنشا قىلمىستىق ءىس تەرگەلۋدە. پوليسيا مالىمەتىنشە، 28 جاستاعى كۇدىكتى الەۋمەتتىك جەلىلەر مەن مەسسەندجەرلەر ارقىلى ازاماتتارعا تۇركياعا ۆيزا راسىمدەۋ قىزمەتىن ۇسىنعان.
پوليسياداعىلاردىڭ ايتۋىنشا، الاياق جابىرلەنۋشىنىڭ سەنىمىنە كىرىپ، قۇجاتتاردى دايىنداۋ جانە ۆيزا راسىمدەۋ شىعىندارىن جابۋ قاجەتتىگىن العا تارتىپ، ودان الدىن الا تولەم العان. الايدا ول ءوز مىندەتتەمەلەرىن ورىنداماعان. اقشانى العاننان كەيىن كۇدىكتى ءارتۇرلى سىلتاۋلارمەن ۋادەسىن كەيىنگە شەگەرىپ، كەيىن مۇلدەم بايلانىسقا شىقپاي قويعان. ناتيجەسىندە جابىرلەنۋشىگە 600 مىڭ تەڭگە كولەمىندە ماتەريالدىق زالال كەلتىرىلگەن.
جەدەل-ىزدەستىرۋ ءىس-شارالارى بارىسىندا پوليسيا قىزمەتكەرلەرى كۇدىكتىنىڭ تۇلعاسىن انىقتاپ، ونى ۇستاعان. وسى فاكتى بويىنشا سوتقا دەيىنگى تەرگەۋ جۇرگىزىلۋدە.
پوليسيا ازاماتتاردى ينتەرنەت ارقىلى ۇسىنىلاتىن قىزمەتتەردى پايدالانۋدا بارىنشا ساق بولۋعا شاقىرادى. ۆيزا راسىمدەۋ، جۇمىسقا ورنالاسۋ نەمەسە باسقا دا اقىلى قىزمەتتەر ءۇشىن الدىن الا تولەم اۋدارار الدىندا قىزمەت كورسەتۋشىنىڭ قىزمەتىنىڭ زاڭدىلىعى مەن سەنىمدىلىگىنە كوز جەتكىزۋ قاجەت. كۇماندى ۇسىنىستارعا سەنبەڭىز، تەك رەسمي ۇيىمدار مەن ليسەنزياسى بار اگەنتتىكتەرگە جۇگىنىڭىز.