باتىس قازاقستان وبلىسىندا ۋچاسكەلىك ينسپەكتوردىڭ سەرگەكتىگىنىڭ ارقاسىندا بالالى وتباسى امان قالدى. ول تۇندە ءورتتى بايقاپ، ۇيىقتاپ جاتقانداردى وياتقان، دەپ حابارلايدى infohub.kz سايتى.
ىشكى ىستەر مينيسترلىگىنىڭ مالىمەتىنشە، وقيعا 1 قىركۇيەككە قاراعان ءتۇنى جاڭعالا اۋدانىنىڭ قىرقوپا اۋىلىندا بولعان. پاترۋلدەۋ كەزىندە ۋچاسكەلىك ينسپەكتور نۇرلىباي نۇرمۇحانوۆ ءبىر ءۇيدىڭ ۇستىنەن قويۋ ءتۇتىن كوتەرىلىپ جاتقانىن بايقاعان.
شامامەن 04:30-دە پوليسيا قىزمەتكەرى دەرەۋ وقيعا ورنىنا بەت العان. ول جەرگە جەتكەندە، تۇرعىن ۇيگە ىرگەلەس ورنالاسقان مال قوراسىنىڭ جانىپ جاتقانىن جانە وتتىڭ ۇيگە قاراي تاراي باستاعانىن كورگەن.
ۋاقىت جوعالتپاي، پوليسەي ءۇي تۇرعىندارىن وياتىپ، ولارعا بالالارىمەن بىرگە ءقاۋىپتى ايماقتان شىعۋعا كومەكتەسكەن. ءورت سوندىرۋشىلەر كەلگەنگە دەيىن ول ءۇي يەلەرىمەن بىرگە جانعان قورادان مالدى الىپ شىعىپ، قۇمنىڭ كومەگىمەن وتتىڭ تۇرعىن ۇيگە تاراۋىنا جول بەرمەي، وقشاۋلاۋ شارالارىن قولدانعان.
ءۇي يەسى ەسقالي مۇراتوۆ قۇتقارۋشىعا العىسىن ءبىلدىردى: "ەگەر نۇرلىباي كەلىپ، ءبىزدى وياتپاعاندا، بىزگە جانە بالالارىمىزعا نە بولار ەدى، ءتىپتى بىلمەيمىن. ءبىزدىڭ وتباسى وعان شەكسىز ريزا".
وسىلايشا، وتباسى اپاتتان امان قالىپ، تۇرعىن ءۇي مەن م ۇلىك ورتتەن ساقتالىپ قالدى.