اقتوبەدە پوليسيا دەپارتامەنتى عيماراتىنىڭ الدىنا ۇلتتىق كيىم دۇكەنىنە قاتىستى الاياقتىق ءىسى بويىنشا زارداپ شەككەندەر جينالدى. ولار تەرگەۋدىڭ بارىسىنا نارازىلىق بىلدىرۋدە، دەپ حابارلايدى infohub.kz سايتى.
زارداپ شەككەندەردىڭ ءبىرى اسەل دۋيسوۆا بىلاي دەدى: «ولاردىڭ جارناماسىندا بەس جىلدان استام ۋاقىت جۇمىس ىستەپ كەلە جاتقانى، ديۆيدەند تولەيتىنى ايتىلعان. ايتالىق، سەن اقشا سالاسىڭ، ساعان 20 پايىزدان جوعارى ديۆيدەند بەرەدى. ماعان ولاردىڭ اشەكەيلەرى، ءوندىرىسى، ۇلتتىق ستيلدەگى بۇيىمدارى قىزىقتى بولدى. مەن پايىزعا وبراز الۋ ءۇشىن اقشا سالدىم».
ادۆوكات نۇربولات قامىسباي سحەماعا كەمىندە ءتورت ادام قاتىسقانىن مالىمدەدى. «بىرەۋىنە قاتىستى ءۇيقاماق تۇرىندەگى بۇلتارتپاۋ شاراسى قولدانىلدى. قالعاندارى ءىس بويىنشا كۋاگەر رەتىندە وتۋدە. ال تورتەۋىنىڭ دە ءرولى ايقىندالعان. ءارقايسىسىنىڭ ءوز ءرولى بار. بۇل ۇيىمدى ءبىر ادام باسقارعان. ولار پايدا تاۋىپ وتىرعان، ياعني توپتىڭ تۇراقتىلىعى بولعان»، — دەپ ءتۇسىندىردى ول.
ۇلتتىق ستيلدەگى كيىم مەن اشەكەيلەر ساتاتىن دۇكەن اقتوبەلىكتەردىڭ اقشاسىن تارتقان. ساتىپ الۋشىلارعا برەندتىڭ ينۆەستورى بولۋدى ۇسىنىپ، 20 پايىز جانە ودان جوعارى تابىس ۋادە ەتكەن. تولەمدەر اي سايىن جۇرگىزىلۋى كەرەك ەدى، ال بونۋس رەتىندە اسسورتيمەنتتەن كەز كەلگەن تاۋاردى تاڭداۋعا بولاتىن. الايدا كوپ ۇزاماي تولەمدەر توقتاعان.
پوليسيا مالىمەتىنشە، زارداپ شەككەندەر رەتىندە 68 ادام تانىلعان. جالپى شىعىن الدىن الا ەسەپتەۋ بويىنشا 100 ملن تەڭگەگە جۋىق. قۇقىق قورعاۋ ورگاندارى كىنالىلەر جازالاناتىنىن سەندىرۋدە. اقتوبە وبلىسى پد باستىعىنىڭ ورىنباسارى اسەت قاليەۆ: «قاجەتتى تەرگەۋ ارەكەتتەرى جۇرگىزىلدى. اتالعان دۇكەننىڭ نەگىزىن قالاۋشىعا قاتىستى سوت بۇلتارتپاۋ شاراسىن قولداندى. سونداي-اق قىلمىستىق ءىس بويىنشا بەس ادام كۇدىكتى دەپ تانىلدى، ونىڭ ىشىندە دۇكەن نەگىزىن قالاۋشىنىڭ تۋىسى مەن قۇربىسى دا بار»، — دەپ حابارلادى.
بۇعان دەيىن اقتوبە قالالىق پوليسيا باسقارماسى ۇلتتىق برەندتى دامىتۋعا ينۆەستيسيا تارتۋعا بايلانىستى الاياقتىق فاكتىسى بويىنشا قىلمىستىق ءىس تەرگەلىپ جاتقانى حابارلانعان بولاتىن. 2024 جىلدىڭ باسىنان باستاپ ايماق تۇرعىندارىنا Instagram ارقىلى ۇلتتىق ستيلدەگى كيىم مەن اكسەسسۋارلار ساتاتىن دۇكەننىڭ قىزمەتى تۋرالى ايتىلعان. دۇكەننىڭ پاراقشاسىندا جوعارى تابىس ۋادە ەتىپ، ينۆەستيسيا سالۋ مۇمكىندىگى تۋرالى اقپارات ورنالاستىرىلعان. سول كەزدە 8 زارداپ شەككەن بولعان، شىعىن كولەمى 72 ملن تەڭگەدەن استامدى قۇراعان.