قازاقستاندا مەديسينالىق پرەپاراتتاردى ساقتاۋ مەن جەتكىزۋدى ەندى ەلەكترونيكا باقىلايدى. ۆاكسينالاردىڭ تەمپەراتۋرالىق رەجيمنىڭ بۇزىلۋىنان ب ۇلىنبەۋىن قامتاماسىز ەتۋ ءۇشىن كولىكتەگى 21 مىڭنان استام داچيك پەن ترەكەر جۇمىس ىستەيدى. بۇل تۋرالى infohub.kz سايتى حابارلايدى.
دەنساۋلىق ساقتاۋ مينيسترلىگىنىڭ مالىمەتىنشە، رەسپۋبليكادا ۆاكسينالاردىڭ «سۋىق تىزبەگىن» باقىلاۋدىڭ سيفرلىق جۇيەسى كەڭەيتىلۋدە. ەندى ساقتاۋ تەمپەراتۋراسى GPS-مونيتورينگ ارقىلى اۆتوماتتى تۇردە باقىلانادى.
ەلدىڭ باس سانيتارلىق دارىگەرى سارحات بەيسەنوۆانىڭ ايتۋىنشا، جۇيە قازاقستان بويىنشا مىڭنان استام نىساندى قامتيدى. جۇمىس بارلىق كەزەڭدە – ساقتاۋدان باستاپ قويمالار مەن مەديسينالىق ۇيىمدارعا جەتكىزۋگە دەيىن جۇزەگە اسىرىلادى.
«توڭازىتقىش جابدىقتاردان الىنعان دەرەكتەر اۆتوماتتى تۇردە ءبىرىڭعاي سيفرلىق پلاتفورماعا تۇسەدى. ۆاكسينالاردى تاسىمالداۋ كەزىندە ارنايى كولىكتەرگە GPS-مونيتورينگ جۇمىس ىستەيدى»، – دەلىنگەن حابارلامادا.
نورمادان نەمەسە بەلگىلەنگەن پارامەترلەردەن كەز كەلگەن اۋىتقۋ كەزىندە پروبلەمانىڭ قاي كەزەڭدە تۋىنداعانىن تەز انىقتاپ، قاجەتتى شارالاردى جەدەل قابىلداۋعا بولاتىنى اتاپ ءوتىلدى.
جالپى، مينيسترلىك 3،5 مىڭنان استام نىساندى قامتي وتىرىپ، 21 مىڭنان استام مونيتورينگ نۇكتەسىن قۇرۋدى جوسپارلاپ وتىر. سونىمەن قاتار، رەسپۋبليكانىڭ بارلىق وڭىرىندە 800 ارنايى كولىك بىرلىگىنە باقىلاۋ جاسالاتىن بولادى.
سونداي-اق ۆاكسينا ساقتاۋعا ارنالعان جابدىقتار جاڭارتىلۋدا. ەلدىڭ مەديسينالىق ۇيىمدارى ءۇشىن جاڭا توڭازىتقىش كامەرالار، مۇزداتقىشتار جانە 900-دەن استام توڭازىتقىش ساتىپ الۋ جوسپارلانۋدا.
بۇعان دەيىن «كۋرسيۆ» دەنساۋلىق ساقتاۋ مينيسترلىگى قر-داعى مەديسينالىق قىزمەتتى ليسەنزيالاۋ تالاپتارىن كۇشەيتكەنىن جازعان بولاتىن. ەندى مەملەكەتتىك جانە جەكە كلينيكالار مەديسينالىق سيفرلىق جۇيە (مسج) بولعان جاعدايدا عانا جۇمىس ىستەي الادى.