رەسمي جۇمىستىڭ بولماۋى اتا-انانى بالالارىن اسىراۋ مىندەتىنەن بوساتپايدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە سوت ورىنداۋشىسى داۋرەن ونلاسىن جۇمىسسىز قازاقستاندىقتار اليمەنت تولەمەۋگە قۇقىلى ما دەگەن سۇراققا جاۋاپ بەرىپ، مالىمدەدى، دەپ حابارلايدى infohub.kz سايتى.
سپيكەردىڭ ايتۋىنشا، رەسمي جۇمىستىڭ بولماۋى قازاقستاندا اليمەنت مىندەتتەمەلەرىن توقتاتپايدى. ول قازاقستان رەسپۋبليكاسىنىڭ «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭىنا سىلتەمە جاسادى: تابىس بولماعان جاعدايدا بەرەشەك قازاقستان رەسپۋبليكاسىنداعى ورتاشا جالاقىنى ەسكەرە وتىرىپ ەسەپتەلەدى.
«سوندىقتان بورىشكەردىڭ: „مەن رەسمي تۇردە ەش جەردە جۇمىس ىستەمەيمىن، سوندىقتان اليمەنت تولەۋگە مىندەتتى ەمەسپىن“ دەگەن ۇستانىمى زاڭدى تۇردە نەگىزسىز»، — دەدى داۋرەن ونلاسىن.
ول سونداي-اق اليمەنت ءوندىرۋ تۋرالى سوت اكتىسىن ورىنداماعانى ءۇشىن قانداي جاۋاپكەرشىلىك تۋىندايتىنىن ءتۇسىندىردى. ەگەر قىلمىستىق قۇقىق بۇزۋشىلىق بەلگىلەرى بولماسا، بورىشكەر قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 669-بابى بويىنشا اكىمشىلىك جاۋاپكەرشىلىككە تارتىلۋى مۇمكىن.
اليمەنتتى ۇزاق ۋاقىت تولەمەگەن جاعدايدا قازاقستان رەسپۋبليكاسىنىڭ قىلمىستىق كودەكسىنىڭ 139-بابى بويىنشا قىلمىستىق جاۋاپكەرشىلىك تۋىندايدى. ەگەر اتا-انا اليمەنتتى ءۇش ايدان استام تولەمەسە، وعان 600 ساعاتقا دەيىن قوعامدىق جۇمىس تاعايىندالۋى، بوستاندىعى شەكتەلۋى نەمەسە 2 جىلعا دەيىن باس بوستاندىعىنان ايىرىلۋى مۇمكىن. سونىمەن قاتار، قازاقستان رەسپۋبليكاسىنىڭ قىلمىستىق كودەكسىنىڭ 430-بابى قولدانىلۋى مۇمكىن، دەپ قورىتىندىلادى داۋرەن ونلاسىن.
بۇعان دەيىن قازاقستاندا 25 تامىزدان باستاپ اليمەنت تولەۋ ءتارتىبى وزگەرەتىنى حابارلانعان. ماماندار ەلىمىزدىڭ تۇرعىندارى مىندەتتى تۇردە ءبىلۋى كەرەك نارسەلەردى ەسكە سالىپ، ءتۇسىندىردى.