بۇرىن زەينەتاقى جيناعىنىڭ ارتىق بولىگىن ءبىرىڭعاي جيناقتاۋشى زەينەتاقى قورىنان (بجزق) وتباسى بانكىندەگى دەپوزيتكە اۋدارعان قازاقستاندىقتاردا بۇل قاراجاتتى جۇمساۋعا التى جىل ۋاقىت بار. اقشا ماقساتىنا ساي پايدالانىلماسا، ول قايتادان زەينەتاقى قورىنا قايتارىلادى، دەپ حابارلايدى infohub.kz سايتى.
2021 جىلى جيناعىن بجزق-دان وتباسى بانكىندەگى دەپوزيتكە اۋدارعان ازاماتتاردىڭ قاراجاتىن پايدالانۋ مەرزىمى 2027 جىلى بىتەدى. وسىنداي قازاقستاندىقتار نە يپوتەكا راسىمدەۋى، نە بۇرىن العان تۇرعىن ءۇي قارىزىن قايتا قارجىلاندىرۋى قاجەت — ايتپەسە اقشا زەينەتاقى شوتىنا قايتادى.
اۋەلدە زەينەتاقى جيناعىن پايدالانۋ مەرزىمى ءۇش جىل بولعان، كەيىن ول التى جىلعا ۇزارتىلدى. دەپوزيتتەگى قاراجاتتى يپوتەكاعا تۇرعىن ءۇي ساتىپ الۋعا، قارىزدى قايتا قارجىلاندىرۋعا نەمەسە جەر تەلىمى بولعان جاعدايدا ءۇي سالۋعا جۇمساۋعا رۇقسات ەتىلگەن.
مەرزىم بجزق-دان اۋدارىلعان كۇننەن باستاپ ەسەپتەلەدى. اۋدارىم بىرنەشە رەت بولسا، مەرزىم ءارقايسىسى بويىنشا جەكە ەسەپتەلەدى.
مىسالى، 2021 جىلدىڭ جەلتوقسانىندا زەينەتاقى شوتىنان 2 ملن تەڭگە الىنسا، كەلەسى جىلى — 1 ملن، ال 2025 جىلى تاعى 1 ملن الىنسا، 2027 جىلدىڭ جەلتوقسانىندا پايدالانۋ مەرزىمى تەك العاشقى 2 ملن تەڭگە بويىنشا اياقتالادى. ونى تۇرعىن ۇيگە جۇمساپ ۇلگەرمەسەڭىز، بۇل سوما بجزق-عا قايتادى، ال قالعان اقشا ازىرگە دەپوزيتتە قالادى.
زەينەتاقى جيناعىن پايدالانۋ مەرزىمىنىڭ اياقتالاتىن كۇنىن enpf-otbasy.kz سايتىنداعى وتىنىمدەر بولىمىنەن بىلۋگە بولادى. زەينەتاقى جيناعىن اۋدارۋعا بەرىلگەن ءوتىنىمدى تاۋىپ، ونىڭ كۇنىن قاراۋ كەرەك.
بجزق-دان بۇرىن اۋدارىلعان قاراجاتتى جۇمساماس بۇرىن، وتباسى بانكىنىڭ كوپتەگەن ستاندارتتى يپوتەكالىق باعدارلامالارى بويىنشا شوتتا تۇرعىن ءۇي قۇنىنىڭ 50%-ى بولۋى تالاپ ەتىلەتىنىن ەسكەرگەن ءجون. ماسەلەن، 30 ملن تەڭگەگە پاتەر الۋ ءۇشىن 15 ملن تەڭگە جارنا قاجەت. شوتتا بار بولعانى 5 ملن بولسا، تاعى 10 ملن تەڭگە قوسۋعا تۋرا كەلەدى.
سونىمەن قاتار وتباسى بانكىنىڭ جارنا سوماسى ازىراق باسقا دا باعدارلامالارى بار، الايدا ولارعا قاتىسۋ شەكتەۋلى بولۋى مۇمكىن. اتاپ ايتقاندا، بەلگىلى كاسىپ يەلەرى مەن 35 جاسقا دەيىنگى ادامدارعا ارنالعان وڭىرلىك باعدارلامالار — «الماتى جاستارى»، «ەلوردا جاستارى» جانە جارناسى 10%-دان باستالاتىن باسقالارى، «ناۋرىز» باعدارلاماسى — جارنا 10–20%، «30/70» — بانك سەرىكتەستەرىنەن باستاپقى تۇرعىن ءۇي ساتىپ العاندا 30%-دان.
ەگەر قاراجاتتى ءبارىبىر جۇمساي الماي، ول بجزق شوتىنا قايتارىلسا، بولاشاقتا ونى الۋ قيىنعا سوعادى، سەبەبى شەكتەۋلەر بىرنەشە ەسە ءوستى.
بۇعان دەيىن 2026 جىلدىڭ تامىزىندا تۇرعىن ءۇي جاعدايىن جاقسارتۋعا زەينەتاقى جيناعىن الۋ كولەمى 27،5 ملرد تەڭگەگە جەتكەنى حابارلانعان. بۇل كورسەتكىش شىلدەدەگى 27،1 ملرد تەڭگە ناتيجەسىمەن ءىس جۇزىندە تۇسپا-تۇس كەلدى.