جامبىل وبلىسىندا پوليسيا قىزمەتكەرلەرى ۇلتتىق ۇلان ساربازدارىنىڭ قولداۋىمەن ءىرى ەسىرتكى پلانتاسياسىن جويۋ بويىنشا ارنايى وپەراسيا وتكىزدى، دەپ حابارلايدى infohub.kz سايتى.
ىشكى ىستەر مينيسترلىگىنىڭ اقپاراتتىق مەدياپورتالى مالىمدەگەندەي، ءوڭىردىڭ قۇمدى ايماعىندا اۆتونومدى ەلەكترمەن جابدىقتاۋ جانە سۋارۋ جۇيەسىمەن جابدىقتالعان، جاسىرىلعان ءۇندى كەندىرى پلانتاسياسى تابىلدى.
جاسىرىن نىساندى انىقتاۋدا اۋە بارلاۋى شەشۋشى ءرول اتقاردى. ۇشقىشسىز ۇشۋ اپپاراتتارىن قولدانۋ جانە جەدەل قىزمەتكەرلەردىڭ ۇيلەسىمدى ارەكەتتەرىنىڭ ارقاسىندا كۇدىكتى قۇقىققا قارسى ارەكەت ورنىندا ۇستالدى.
«ول بۇرىن بىرنەشە رەت سوتتالعان 40 جاستاعى تاراز تۇرعىنى بولىپ شىقتى. ول تىيىم سالىنعان وسىمدىكتەردى ودان ءارى وڭدەۋ جانە وڭىردەن تىس جەردە كوتەرمە ساتۋ ماقساتىندا وسىرگەن»، — دەدى ۆەدومستۆودا.
ءتىنتۋ بارىسىندا 50 ەكى مەترلىك كەندىر بۇتاسى، 438 كگ ماريحۋانا، قاپتاما ماتەريالدارى جانە ارنايى اگروقۇرال-جابدىقتار تاركىلەندى.
جەدەل قىزمەتكەرلەردىڭ ەرەكشە نازارىن نومىرلەرى قاعىلعان، وقتارى بار ماكاروۆ تاپانشاسى تارتتى. سونداي-اق 12ء-شى كاليبرلى «بايكال» مىلتىعى، ونىڭ وق-دارىلەرى جانە شيكىزات تاسىمالداعان جول تالعامايتىن كولىك تاركىلەندى.
كۇدىكتىگە قازاقستان رەسپۋبليكاسى قىلمىستىق كودەكسىنىڭ 300 جانە 287-باپتارى بويىنشا ەسىرتكىنى زاڭسىز ءوسىرۋ جانە قارۋ ۇستاۋ فاكتىلەرى بويىنشا قىلمىستىق ىستەر قوزعالدى. كۇدىكتى كىناسىن مويىنداپ، ۋاقىتشا ۇستاۋ يزولياتورىنا قامالدى.
قازىرگى تاڭدا ەسىرتكىنىڭ زاڭسىز اينالىمىنا قاتىسى بار باسقا ادامداردى انىقتاۋ بويىنشا كەشەندى ءىس-شارالار جۇرگىزىلۋدە.